بەيبىتتى «قاجىمۇقان» دەپ اتاساق تا جاراسادى - ا. شورايەۆ

استانا. قازاقپارات - ب. ىستىبايەۆتى «قاجىمۇقان» دەپ اتاساق تا جاراسادى.

بۇگىن ورتالىق كوممۋنيكاتسيالار قىزمەتىندە «قازاقستان بارىسى-2016» رەسپۋبليكالىق ءتۋرنيرىنىڭ قورىتىندىسىنا ارنالعان بريفينگتە «قازاقستان بارىسى» قازاق كۇرەسىن دامىتۋ قورىنىڭ ءتوراعاسى ارمان شورايەۆ وسىلاي مالىمدەدى.

«بيىلعى تۋرنير ەرەكشە ءوتتى. بەيبىت ىستىبايەۆ ءۇشىنشى مارتە «قازاقستان بارىسى» اتانىپ وتىر. شىندىعىندا، بەيبىتتى «قاجىمۇقان» دەپ اتاساق تا بولادى. وسىنداي ەل نامىسىن، ۇلت نامىسىن قورعاعان باتىرلار، بالۋاندار تاريحتا قاشاندا بولعان. وكىنىشكە قاراي، جۇرت اۋزىندا ناۋرىزباي، قابانباي باتىر دەپ كوپ ايتىلعانىمەن، ولاردىڭ بەينەسى دە بەلگىسىز بىزگە. ال بەيبىتكە كەلسەك، ول سول بابالارىمىزدىڭ بەينەسىن كوز الدىمىزعا اكەلەدى»، - دەدى ا. شورايەۆ.

ونىڭ ايتۋىنشا، تۋرنير جۇرتتىڭ دا كوڭىلىنەن شىقتى. «ارينە، كەمشىلىكتەر بولمايدى دەپ ايتۋعا كەلمەيدى. ول قاشاندا بولىپ تۇرادى. دەگەنمەن، ءبىز التىنشى مارتە تۋرنير وتكىزىپ وتىرمىز. شەتەلدىك ارىپتەستەرىمىز دە وسال ەمەس. رەسەيدەن، تۇركيادان كەلىپ جاتىر. سوندىقتان دا، ءبىزدىڭ كوماندامىز حالىقارالىق دەپ ايتۋعا كەلەدى. ۇيىمداستىرۋشىلىق جاعىن جوعارى باعالايمىن. «قازاقستان بارىسى» ءتۋرنيرىن رەسەي مەن تۇركيا تەلەارنالارى تىكەلەي تاراتادى، الەمنىڭ 120 ەلىندەگى اۋديتوريانى قامتىپ وتىر»، - دەدى ا. شورايەۆ.

ەسكە سالساق، جاقىندا استانادا وتكەن التىنشى «قازاقستان بارىسى-2016» رەسپۋبليكالىق ءتۋرنيرىنىڭ جەڭىمپازى بەيبىت ىستىبايەۆ اتانعان بولاتىن. بەيبىت ىستىبايەۆ وسىعان دەيىن 2012 جانە 2015 -جىلى «قازاقستان بارىسى» اتاعىنا قول جەتكىزگەن ەدى. تۋرنير جەڭىمپازى ب. ىستىبايەۆقا 25000000 تەڭگە، التىن تايتۇياق جانە استانادان ءبىر بولمەلى پاتەر بەرىلدى. ەكىنشى ورىن العان جۇمانازار ەرسۇلتانوۆقا 5500000 تەڭگە، ءۇشىنشى ورىن العان ايبول ايتبەككە 1800000 تەڭگە كولەمىندە سىيلىق تابىستالدى.

اۆتور: قانات مامەتقازى ۇلى