ن. نازاربايەۆ: قازاقستان مەن قىتايدىڭ ەكونوميكالىق ىنتىماقتاستىعىن نىعايتۋعا سەپتىگىن تيگىزىپ وتىرعان كومپانيا تۋرالى ايتتى
كەزدەسۋ بارىسىندا كومپانيانىڭ قازاقستانداعى قازىرگى قىزمەتىنىڭ ماسەلەلەرى، سونىڭ ىشىندە قاشاعان كەن ورنىنداعى جوندەۋ-قالپىنا كەلتىرۋ جۇمىستارىنىڭ جايى جانە قازاقستان گازىن قىتايعا ەكسپورتتاۋدىڭ پەرسپەكتيۆالارى تالقىلاندى.
مەملەكەت باسشىسى CNPC قازاقستانداعى ءىرى ينۆەستورلاردىڭ ءبىرى بولا وتىرىپ، ەكى ەل اراسىنداعى ەكونوميكالىق ىنتىماقتاستىقتى تەرەڭدەتۋگە سەپتىگىن تيگىزىپ كەلە جاتقانىن اتاپ ءوتتى.
- 1997-جىلدان باستاپ كومپانيا ءبىزدىڭ ەكونوميكامىزعا 10 ميلليارد دوللار ينۆەستيتسيالاپ، تاعى 20 ميلليارد دوللاردى مۇناي كەن ورىندارىن بارلاۋ مەن يگەرۋ، مۇناي جانە گاز قۇبىرلارىن تارتۋ ىسىنە جۇمسادى. بۇل - وتە ۇلكەن ينۆەستيتسيا. قازىرگى كەزدە بارلىق مۇناي كومپانيالارى ەنەرگيا رەسۋرستارىنىڭ الەمدىك باعاسىنىڭ تومەندەۋىنە بايلانىستى تۋىنداعان قيىندىقتاردى باستان وتكەرۋدە. سوندىقتان بۇدان ءارى جۇزەگە اسىراتىن ارەكەتتەرىمىزدى تالقىلايتىن كەز كەلدى، - دەدى نۇرسۇلتان نازاربايەۆ.
سونداي-اق، قازاقستان پرەزيدەنتى CNPC كورپوراتسياسىنىڭ باسشىسىنا استاناداعى ۇلتتىق ءبي مەن بالەت جوعارعى مەكتەبىنىڭ قۇرىلىسىنا اتسالىسقانى ءۇشىن العىس ايتتى.
ۆان يلين مەملەكەت باسشىسىنا كومپانيا قىزمەتىن قولداپ وتىرعانى ءۇشىن ريزاشىلىق ءبىلدىرىپ، الداعى كەزەڭدەگى جۇمىستاردىڭ جوسپارى تۋرالى حاباردار ەتتى.
