زەرتتەۋ: توڭعاق جانداردىڭ باسقالاردان ارتىقشىلىعى نە؟

استانا. قازاقپارات - جىلى جەردە دە ۇنەمى قالتىراپ، توڭىپ جۇرەتىن جاندار ءوزىنىڭ بۇل قىلىعىن جايسىزدىق دەۋى مۇمكىن.

الايدا، مۇنداي توڭعاق جانداردىڭ باسقالاردان ۇلكەن ارتىقشىلىعى بار. عالىمدار جاۋراعىش جانداردىڭ ۇزاعىراق ءومىر سۇرەتىنىن انىقتادى.

ۆاشينگتون ۋنيۆەرسيتەتىنىڭ ماماندارى ادام دەنەسىنىڭ تەمپەراتۋراسى ءومىر ءسۇرۋ ۇزاقتىعىمەن بايلانىستى دەگەن شەشىمگە كەلدى. ۇدايى توڭىپ ءجۇرۋ ۇزاق ءومىر سۇرۋمەن بايلانىستى ناقتى گورموندىق وزگەرىستەردىڭ بەلگىسى دەپ سانايدى.

عالىمدار جاسى ەلۋگە كەلگەن 24 ەر جانە ايەلگە ەكسپەريمەنتتەر جۇرگىزگەن. ولاردى ءۇش توپقا ءبولدى: ءبىرىنشى توپ مۇشەلەرىنىڭ كۇندەلىكتى تۇتىناتىن كالوري مولشەرىن %25 ازايتتى، ەكىنشى توپقا راتسيونىن ەش كەمىتپەي، سوپرتپەن بەلسەندى تۇردە اينالىسۋدى مىندەتتەدى، ءۇشىنشى توپ جاي عانا باقىلاۋدا بولدى.

ەكسپەريمەنت ناتيجەسى بويىنشا، كالوري مولشەرىن ازايتقان ءبىرىنشى توپ مۇشەلەرىنىڭ دەنە تەمپەراتۋراسى تومەندەگەن. ولار قاتتى توڭعانىن ايتىپ شاعىمدانعان، ال اعزالارىن تەكسەرگەندە، ولاردىڭ دەنەسى ۇزاق ءومىر ءسۇرۋدىڭ الەۋەتتى رەسۋرسىن جيناعانى انىقتالدى. «ولاردىڭ اعزاسىنداعى گورموندىق وزگەرىستەر مەتابوليزمدى باسەڭدەتتى، وسىلايشا ەنەرگيا مەن جىلۋ ۇنەمدەلدى»، - دەپ حابارلادى تاجىريبە اۆتورلارى.

عالىمدار ۇزاق ءومىر ءسۇرۋدىڭ قۇپياسى - اشتىق پەن سۋىق دەپ ەسەپتەيدى. ەرتەرەكتە لابوراتوريالىق تىشقاندارعا جۇرگىزىلگەن ەكسپەريمەنت تە وسىنى كورسەتكەن ەدى: دەنە تەمپەراتۋراسىنىڭ 0,2-0,5 گرادۋسقا تومەندەۋىنەن اتالىقتىڭ - %12، انالىقتىڭ - %20 ءومىرى ۇزارعان، دەپ جازادى شەتەلدىك ب ا ق.