قىدىرالى بولمانوۆ تورەعاليدىڭ قاتىسۋىمەن قازاقستاندا ەشكىم قويىپ كورمەگەن كونسەرت جاساماق

استانا. قازاقپارات - تانىمال ءانشى، بەلگىلى پروديۋسەر قىدىرالى بولمانوۆ تاياۋدا ۇلكەن مەرەيتويلىق كونسەرت بەرۋگە دايىندالىپ جاتىر.

بۇل تۋرالى «جۇلدىزدار جارقىرايدى» باعدارلاماسىندا ايتتى.

«بيىل «ا ب ك» توبىنىڭ 20 جىلدىعى، « ۇلىتاۋ» توبىنىڭ 15 جىلدىعى، قاراقاتتىڭ ون بەس جىلدىعى ساحنادا. وسىنىڭ بارلىعىن اتاپ وتپەكپىز»، - دەيدى پروديۋسەر.

ەلدىڭ كوڭىلىنەن شىعىپ، حالىق كونسەرتتەن جاقسى اسەر الىپ شىعۋ ءۇشىن پروديۋسەر قازىرگى تاڭدا ماڭداي تەرىن شەلەكتەپ توگىپ جاتىر ەكەن. كونسەرتتە بۇرىن-سوڭدى قولدانىلماعان تەحنيكالاردى پايدالانىپ، ەرەكشە شوۋ جاساماق.

«ۇلكەن 500 كۆادراتتى LED ەكران قويماقشىمىز، 200 كيللوۆاتقا جۋىق دىبىس قويماقشىمىز. ەندى ونى قازاقستاندا ەشكىم قويىپ كورگەن جوق»، - دەدى قىدىرالى.

وسىلايشا تەك عانا شەتەلدىك انشىلەر قولدانىپ كەلگەن تەحنيكانى قازاقستانعا اكەلىپ، العاش رەت بولمىسى ەرەكشە كونسەرت بەرمەكشى. قازىر شوۋدى ۇيىمداستىرۋعا 40 تان استام مامان جۇمىلدىرىلىپ جاتىر ەكەن.

ءبىر قىزىعى، جيىرما جىلدىق مەرەيتويىندا «ا ب ك» توبىنىڭ ورىنداۋىنداعى «ءبىر تامشى جاس» ءانىن قىدىرالى جاس ءانشى تورەعالي تورەالىگە ورىنداتپاق. «تورەعالي تورەالى، ءان ايتۋدى ءبىزدىڭ «ءبىر تامشى جاستان» باستاعان ەكەن. ول ۆيدەوسى دا بار. ءتاپ- ءتاتتى»، -  دەيدى بولمانوۆ.