بالالاردىڭ سۋعا كەتۋ دەرەگى ارتىپ تۇر - توتەنشە جاعدايلار كوميتەتىنىڭ رەسمي وكىلى
«ءتيىمدى جانە ۋاقىتىلى قابىلدانعان شارالاردىڭ ارقاسىندا جىل باسىنان بەرى سۋعا باتىپ كەتكەن ادامداردىڭ سانى 28 پايىزعا، ياعني 75 ادامعا ازايدى. ال تەك سۋعا شومىلۋ ماۋسىمى كەزىندە ادامداردىڭ سۋعا باتۋى 98 ادامعا تومەندەدى. ماسەلەن، ستاتيستيكالىق دەرەكتەرگە سۇيەنەتىن بولساق، اعىمداعى جىلدىڭ 6 ايىندا سۋ ايىندارىندا 195 ادام، ونىڭ ىشىندە 75 بالا سۋعا باتىپ كەتتى»، - دەدى ول.
رەسمي وكىلدىڭ دەرەكتەرىنە قاراعاندا، وتكەن جىلدىڭ سايكەس كەزەڭىندە 270 ادام، ونىڭ ىشىندە 48 بالا سۋعا باتىپ كەتكەن.
«ال وسى جىلى سۋعا شومىلۋ ماۋسىمى باستالعاننان بەرى 84 ادام، ونىڭ ىشىندە 15 بالا سۋعا كەتتى. ەستە بولسا، وتكەن جىلدىڭ سۋعا شومىلۋ ماۋسىمىنىڭ العاشقى ايىندا 182 ادام، ونىڭ ىشىندە 11 بالا سۋعا باتقان ەدى. دەرەكتەردەن كورىپ وتىرعانىمىزداي، بيىل ادامداردىڭ سۋعا كەتۋى ءبىرشاما تومەندەدى. الايدا، وكىنىشكە وراي، بالالاردىڭ سۋعا باتۋى كوبەيىپ تۇر»، - دەدى ر. يمانقۇلوۆ.
اۆتور: مارلان جيەمباي
