08:51, 02 - شىلدە 2016 | GMT +5
ساياباق ماماندارى ەشكىنىڭ كومەگىمەن ارام ءشوپتى جويۋدىڭ تىڭ ءادىسىن تاپتى
استانا. قازاقپارات - نيۋ-يوركتەگى ساياباق ماماندارى ارام ءشوپتى جويۋدىڭ ارزان ءارى ەكولوگيالىق تازا ءتاسىلىن تاپتى.
پارك بۇل ماقساتتا ەشكىلەردىڭ كومەگىن پايدالاناتىن بولدى، دەپ جازادى 24.kz.
قىزمەتكەرلەردىڭ ايتۋىنشا، بوكتەرگە وڭاي ورمەلەيتىن بۇل جانۋارلار تەك ارام ءشوپتى تاڭداپ جەيدى ەكەن. بۇل امال جۇمىسشىلاردى جالداۋدان گورى ارزانعا تۇسەدى. ساياباق ماماندارى ەشكىلەردى ەكى ايعا جالعا العان. ازىرشە تەكەلەر قورشالعان شاعىن كوگالدا ءجۇر. ەگەر تاجىريبە ءساتتى وتسە، ولاردى بۇكىل پاركتەگى ارام ءشوپتى جويۋعا جىبەرمەك. بۇعان جەرگىلىكتى تۇرعىندار دا قۋانىپ ءجۇر.
«نيۋ-يوركتا ونسىز دا اۋا لاس، قۇرامىندا قورعاسىن كوپ. سول سەبەپتەن ارام ءشوپتى ەكولوگيالىق تازا ادىسپەن قۇرتۋ دۇرىس قادام دەپ سانايمىن»، - دەيدى نيۋ-يورك تۇرعىنى دجەيسون ماللينگس.
