ۋكراينا پرەزيدەنتى قازاقستان باسشىسىنا داعدارىستى شەشۋ ىسىندەگى اراعايىندىق قىزمەتىن جالعاستىرا بەرۋ جونىندەگى ءوتىنىشىن جەتكىزدى
اڭگىمە بارىسىندا ۋكراينا پرەزيدەنتى مەملەكەت باسشىسىن قازاقستاننىڭ ب ۇ ۇ قاۋىپسىزدىك كەڭەسىنىڭ 2017-2018 -جىلدارداعى تۇراقتى ەمەس مۇشەلىگى سايلاۋىنداعى جەڭىسىمەن قۇتتىقتادى، دەپ حابارلادى اقوردانىڭ باسپا ءسوز قىزمەتى.
ەكى ەل كوشباسشىلارى ەكىجاقتى ىنتىماقتاستىقتىڭ وزەكتى ماسەلەلەرى مەن پەرسپەكتيۆالارىن تالقىلاپ، قازاقستان مەن ۋكراينانىڭ ەكونوميكالىق ىنتىماقتاستىق جونىندەگى مەملەكەتارالىق كوميسسياسىنىڭ وتىرىسىن بيىل وتكىزۋگە ۋاعدالاستى.
پ. پوروشەنكو قازاقستان پرەزيدەنتىن ۋكرايناعا مەملەكەتتىك ساپارمەن كەلۋگە شاقىردى.
مەملەكەتتەر باسشىلارى ۋكراينانىڭ وڭتۇستىك- شىعىسىنداعى احۋال تۋرالى پىكىر الماستى. پ. پوروشەنكو نۇرسۇلتان نازاربايەۆقا داعدارىستى شەشۋ ىسىندەگى اراعايىندىق قىزمەتىن جالعاستىرا بەرۋ جونىندەگى ءوتىنىشىن جەتكىزدى.
تەلەفون ارقىلى سويلەسۋگە ۋكراينا جاعى باستاماشىلىق ەتتى.
