سينوپتيكتەر الماتىدا كۇننىڭ نەگە قاتتى كۇركىرەگەنىن ءتۇسىندىرىپ بەردى

الماتى. قازاقپارات - بۇگىن الماتىدا تاڭەرتەڭگىلىك ۋاقىتتا كۇن قاتتى كۇركىرەگەن بولاتىن. سينوپتيكتەر وسىعان بايلانىستى تۇسىنىكتەمە بەردى.

«قازگيدرومەت» ر م ك الماتى فيليالىنىڭ مەتەوبولجام ءبولىمىنىڭ باستىعى سۆەتلانا امانقۇلوۆانىڭ ايتۋىنشا، كۇننىڭ كۇركىرەگەنى تاڭەرتەڭگى ساعات 07:25 پەن 08:30 ارالىعىندا بولعان.

«قازىر الماتى وبلىسى اۋماعىندا سيكلون جۇرۋدە. بۇگىن كۇننىڭ بۇلتتى بولۋى، ونىڭ باتىستان شىعىسقا قاراي باعىتتالعانى سوعان بايلانىستى بولىپ وتىر. وسى بۇلتتاردىڭ بويىندا جەكەلەگەن ءىرى بۇلتتار قالىپتاستى. ونىڭ تومەنگى شەگى جەرگە دەيىن 4,5 شاقىرىمدى قۇرايدى. ياعني، تاۋدان دا تومەن. وسى بۇلتتا جىلى جانە سالقىن اۋا ماسسالارىنىڭ ورىن اۋىستىرۋىنا بايلانىستى قارقىندى ۇدەرىستەر، تەمپەراتۋرالىق قاراما- قايشىلىقتار ورىن الىپ، الىپ نايزاعايلار ويناپ جاتىر. بۇل ۇدەرىستەر كوكتەم جانە جاز ايلارىنىڭ باسىندا بولاتىن قالىپتى قۇبىلىس»، - دەدى س. امانقۇلوۆا.

الماتىدا جاقىن اپتالاردا اۋا رايى تۇراقسىز بولادى، نايزاعاي ويناپ، جاڭبىر جاۋادى جانە جەل تۇرادى. 4-6 -شىلدەدە قالانىڭ كەيبىر اۋداندارىندا بۇرشاق جاۋادى دەپ كۇتىلۋدە.