تۇڭعىش رەت الماتىدان يران استاناسى - تەگەرانعا اۋە رەيسى اشىلدى
بۇل ەكى ەل پرەزيدەنتتەرىنىڭ مەملەكەتارالىق ەكونوميكالىق قاتىناستى دامىتۋ جونىندەگى كەلىسىمى ارقاسىندا ىسكە اسىپ وتىر. ۇشاقتار اپتاسىنا ءۇش رەت قاتىنايدى. الماتىدان اۋەگە كوتەرىلگەن ۇشاق تەگەرانعا 2,5 ساعاتتا جەتەدى. جالپى رەيستىڭ اشىلۋى تۋريزمدى دامىتۋعا سەرپىلىس بەرەدى. سونداي-اق قىتايدىڭ بەيجىڭ مەن ءۇرىمجى قالالارىن جالعايتىن ءترانزيتتى جولاۋشىلار قاتىناسىن ۇلعايتپاق.
قازاقستان سىرتقى ىستەر مينيسترلىگىنىڭ مالىمەتى بويىنشا، بىلتىر قازاقستان مەن يران اراسىنداعى ساۋدا اينالىمى 1 ميلليارد ا ق ش دوللارىن قۇراعان. ەندى جاڭا اۋە رەيسىنىڭ اشىلۋىمەن ەكى ەل اراسىنداعى جولاۋشىلار تاسىمالى جىلىنا 7 مىڭ ادامعا جەتەدى دەگەن بولجام بار. قازىرگى كەزدە ەلىمىزدەن يرانعا باراتىن جولاۋشىلاردىڭ 60 پايىزى - تۋريستەر، قالعانى - كاسىپكەرلەر. الداعى ۋاقىتتا ەكى مەملەكەت اراسىنداعى بارىس-كەلىس ۆيزاسىز بولۋى مۇمكىن.
- بۇگىندە يرانعا ۆيزا الۋ قيىن ەمەس. ءبىز ونى بارىنشا جەڭىلدەتۋگە تىرىسىپ جاتىرمىز، قازىر كۇنىنە 15-20 ۆيزا راسىمدەيمىز. بولاشاقتا يرانعا ۆيزاسىز قاتىناۋ ماسەلەسى قاراستىرىلىپ جاتىر. ول ءۇشىن قازاقستانمەن ەكىجاقتى كەلىسىم بولۋ كەرەك. بۇل ءبىزدىڭ ەلدەردىڭ اراسىنداعى قارىم- قاتىناستى ودان ءارى نىعايتۋعا ىقپال ەتەدى دەپ ويلايمىن، - دەدى. يراننىڭ الماتىداعى باس كونسۋلدىعىنىڭ ەكىنشى كونسۋلى ماحمۋد اسادي.
