ن. نازاربايەۆ ءۇي قۇرىلىس كومبيناتىنىڭ جۇمىسىمەن تانىستى - فوتو
ءۇي قۇرىلىسى كومبيناتىنا تاپسىرىس بەرگەن «GLB» ج ش س، ال باس مەردىگەر - «شار قۇرىلىس» كومپانياسى. بۇل - قازاقستاندا بالاماسى جوق ءوندىرىس. سەگىز سەحى بار زاۋىت ءىرى پانەلدى جانە كاركاس قۇراستىرۋ قۇرىلىسىنا ارنالعان تەمىربەتوندى ونىمدەردىڭ بارلىق ءتۇرىن شىعارادى.
استانانىڭ يندۋستريالاندىرۋ پاركىندە ورنالاسقان ءۇي قۇرىلىسى كومبيناتى 15 گەكتار جەرگە ورنالاسقان جانە اۆستريا مەن گەرمانيادا وندىرىلگەن جوعارى تەحنولوگيالى قۇرىلعىلارمەن قامتىلىپ وتىر. زاۋىت جىلىنا 250 مىڭ شارى مەتر قۇرىلىس نىساندارىن قاجەتتى ونىمەن قامتاماسىز ەتە الاتىن قۋاتقا يە. كومبينات سونداي-اق جىلىنا 13000 تەكشە مەتر تەمىر بەتون ونىمدەرىن شىعارا الادى.
ءۇي قۇرىلىسى كومبيناتى «بيزنەستىڭ جول كارتاسى-2020» باعدارلاماسىنىڭ اياسىندا «بايتەرەك» ۇلتتىق باسقارۋشى حولدينگى» ا ق- نىڭ ەنشىلەس ۇيىمى جانە «دامۋ» كاسىپكەرلىكتى دامىتۋ قورىنىڭ قولداۋىمەن سالىنعان.
ءۇي قۇرىلىسى كومبيناتىنىڭ الەۋمەتتىك ماڭىزى تۋرالى دا ايتا كەتكەن ءجون. سەبەبى، زاۋىت تولىق قۋاتتىلىقتا جۇمىس ىستەسە، شامامەن 1200 ادامدى جۇمىسپەن قامتي الادى. ەڭ باستىسى، «GLB» ج ش س ءۇي قۇرىلىس كومبيناتى «نۇرلى جول» باعدارلاماسىنىڭ اياسىندا سالىناتىن ۇيلەردىڭ قۇرىلىسىن ءتيىستى ماتەريالمەن قامتىماق.
«قازىر زاۋىتتا 483 ادام جۇمىس ىستەيدى. بۇل بىرەگەي زاۋىت، سەبەبى تۇرعىن ءۇيدىڭ 85 پايىزى زاۋىتتا جاسالادى. ينجەنەريا تارتۋ، قاسبەت ارلەۋ، تەرەزە ورناتۋ بارلىعى قامتىلعاندىقتان ءۇي قىسقا مەرزىمدە سالىنادى. ياعني، قۇرىلىس مەرزىمى 1,5 جىلدان 6 ايعا دەيىن قىسارادى. ياعني، جارتى جىلدا ورتاشا 16 قاباتتى ءۇي تولىعىمەن دايىن بولادى. زاۋىتتىڭ ەرەكشەلىگى، بۇندا اۆتوماتتاندىرىلعان جۇيە پايدالانىلادى. بولاشاقتا ءبىز كەز كەلگەن قۇرىلىس تۇرىنە، كەز كەلگەن تاپسىرىسقا يكەمدى بولامىز»، - دەيدى «GLB» ج ش س باس ديرەكتورى جاننا بەكتەمىروۆا.
ديرەكتوردىڭ حابارلاۋىنشا، زاۋىتتى سالۋعا 30 ميلليارد 600 ميلليون تەڭگە جۇمسالعان. باسا ايتا كەتەرلىگى، استاناداعى بۇل ءۇي قۇرىلىس كومبيناتى الەمنىڭ ۇزدىك كومبيناتتارىنىڭ بەستىگىنە كىرەدى ەكەن.
