قازاقستاندا توقتاپ قالعان كۆوتا ورالماندارعا قايتا بەرىلەتىن بولدى
سونداي-اق، ەندى ازاماتتىق تا ءبىر جىلدان كەشىكتىرىلمەي بەرىلۋى مىندەت. وسىلايشا، كۇتپەگەن جەردەن باتىل قادامعا بارعان شەنەۋنىكتەر، ءتىپتى جۇمىس پەن باسپانا ماسەلەسىن دە شەشىپ بەرەمىز دەپ ۋادەنى ءۇيىپ توگىپ جاتىر. ءبىراق، ول ءۇشىن شەتەلدەن كەلگەن قازاقتار ۇكىمەت بەلگىلەپ بەرگەن وبلىستارعا عانا بارۋلارى ءتيىس ەكەن.
بۇعان دەيىن شەتەلدەن كەلگەن قانداستارعا ىقتيارحات پەن بانكتەگى ەسەپشوتتا قارجىسى بولۋى تالاپ ەتىلگەن. بۇل شەكتەۋ دە الىنىپ تاستالدى. ءبىراق، زاڭعا تاعى ءبىر جاڭا وزگەرىس ەنگىزىلدى. ياعني جۇمىس پەن باسپانا جانە مەملەكەتتىك كۆوتاعا ىلىگۋ ءۇشىن ۇكىمەت بەلگىلەگەن تەك جەتى وبلىسقا بارۋلارى ءتيىس.
ناقتىراق ايتقاندا اقمولا وبلىسىندا 120 ادامعا، اتىراۋ وبلىسىندا 28 ادامعا، شىعىس قازاقستان وبلىسىندا 260, قوستاناي وبلىسىندا 21 ادامعا تەگىن كۆوتا قاراستىرىلعان. ال سانى جاعىنان كۆوتانىڭ ەڭ كوبى ەلىمىزدىڭ سولتۇستىگىنە بەرىلمەك.
الماتى قالاسى مەملەكەتتىك ەڭبەك ينسپەكتسياسى جانە كوشى-قون باسقارماسىنىڭ ءبولىم باسشىسى:
«پاۆلودار وبلىسىنا 690, سولتۇستىك قازاقستان وبلىسىندا 108 ادام وڭىرلىك كۆوتانى پايدالانۋعا مۇمكىندىكتەرى بار. ول ءۇشىن وسى ايتىلعان وبلىستارعا بارىپ وتىنىشتەرىن قالدىرۋلارى كەرەك»، - دەيدى كۇلىم ىسقاقوۆا.
الايدا، وتىنىشتەر قابىلدانىپ جاتىر دەپ ەلدى ەلەڭ ەتكىزگەن ەڭبەك يسپەكتسياسىنىڭ باستاماسىنا كۇدىكپەن قاراپ وتىرعاندار كوپ. قۇجاتتار ءسوز جۇزىندە قابىلدانىپ جاتقانىمەن، كوشى-قوننىڭ الدىنداعى قىپ-قىزىل داۋ ءالى باسىلعان جوق دەيدى قانداستاردىڭ وزدەرى.
زاڭداعى وزگەرتۋلەرگە سەنسەك، اتامەكەنىنە ورالىپ، جىلداپ ازاماتتىق الا الماي جۇرگەندەردىڭ ەندى جولى بولۋى ءتيىس.
