استانادا جەكپە- جەك ونەرىنىڭ ەكىنشى فەستيۆالى اياقتالدى - فوتو
«مەن بۇل فەستيۆالگە ءبىرىنشى رەت كەلىپ وتىرمىن. بۇدان كەيىن دە بىرلەسە جۇمىس ىستەيمىز دەگەن ۇمىتتەمىن» - دەيدى بەلگىلى سپورتشى.
مادەنيەت باسقارماسى حابارلاعانداي، استانانىڭ 18 جىلدىعىنا ارنالعان جەكپە-جەك ونەرىنىڭ ەكىنشى فەستيۆالى اياقتالدى. فەستيۆال «داۋلەت» ۇلتتىق تەننيس ورتالىعىندا ءوتتى. سپورت سايىسىنا دجيۋ- دجيتسۋ، كاراتە، قويان- قولتىق ۇرىس، سامبو جانە تاعى 7 جەكپە-جەك تۇرىنەن قارا ۇزگەن شەبەرلەر قاتىسقان. كورنەكى 11 جەكپە- جەكتە قازاقستان، رەسەي، قىتاي، يتاليا، جاپونيا مەن فيليپپيننىڭ بەلگىلى سپورتشىلارى سىنعا ءتۇستى.
بۇل فەستيۆالگە باس- اياعى 4 ەلدەن 250 سپورتشى قاتىستى. بيىل ۇيىمداستىرۋشىلاردىڭ دا كورەرمەن قاۋىمعا توسىن سىيى كوپ بولدى.
مىسال ءۇشىن قوناقتارعا ناعىز جاپون سۋموسىن نەمەسە پەكيتي- تيرسيا كالي قارۋىن قالاي قولداناتىنىن كورۋ كورۋ مۇمكىندىگى بەرىلدى. سونداي-اق تىزىمگە بىلتىرعى جىلى بولماعان بىرنەشە ديستسيپلينا ەنگىزىلگەن.
شاقىرتىلعان سپورتشىلار بارلىق سپورت فەدەراتسيالارىندا بىرنەشە كۇن بويى تەگىن شەبەرلىك سىنىپتارىن وتكىزدى.
حالىقارالىق ۆين- چۋن (IWCO) فەدەراتسياسىنىڭ قۇرمەتتى پرەزيدەنتى سيفۋ دونالد ماك استانالىقتارعا ۆين- چۋن تەحنيكاسىن ۇيرەتتى.
دونالد ماك ءوز سوزىندە: «سىزدەردىڭ ەلدەرىڭىزگە العاش رەت كەلىپ تۇرمىن. ماعان ءبارى ۇنادى. استانالارىڭىزعا تاڭقالدىم، جاس ءارى ادەمى قالا. فەستيۆال وتە جوعارى دەڭگەيدە ءوتتى. بۇل ءىس- شارا پايدالى جانە وسكەلەڭ ۇرپاققا ۇلگى بولادى. ولاردىڭ سپورتپەن شۇعىلدانۋى، سالاۋاتتى ءومىر سالتىن ۇستانۋى ماڭىزدى. قازاقستاندىقتار قايىرىمدى ءارى قوناقجاي. مەن بۇنى سەزىندىم. سوندىقتان بارلىعىنا باقىت پەن جاقسىلىق تىلەيمىن» - دەپ اعىنان جارىلدى.
تاي بوكسىنان الەم جانە ەۋروپا چەمپيونى اتانعان ارتەم ليەۆين وسى جەكپە- جەك ونەرىنىڭ ارتىقشىلىقتارىمەن ءبولىستى. بۇگىن سپورتشى اۋەسقويلار اراسىنداعى تاي بوكسىنان الەم چەمپيونى، كاسىبي بوكسشى داۋلەت وتاربايەۆپەن ەلورداداعى سپورت مەكتەپتەرىنىڭ وقۋشىلارى ءۇشىن شەبەرلىك سىنىبىن وتكىزەدى. «Qazaq Batyry» جەكپە-جەك اكادەمياسىندا ساعات 18:00-دە وتەتىن بۇل شارانى كەز كەلگەن ادام تاماشالاي الادى.
فەستيۆالگە قاتىسۋشىلار مۇنداي اۋقىمدى شارانىڭ ۇيىمداستىرىلۋ دەڭگەيىن جوعارى باعالاپ، وسىنداي ەڭبەكتىڭ ارقاسىندا استانادا جەكپە- جەك ونەرىنىڭ جاڭا قارقىن الىپ كەلە جاتقانىن ايتۋدا.
