ىستانبۇل اۋەجايىندا بولعان قازاقستاندىقتار جارىلىستار تۋرالى ايتىپ بەردى

استانا. قازاقپارات - ىستانبۇل اۋەجايىندا جارىلىس بولعان ۋاقىتتا استانادان بولگارياعا ۇشاتىن قازاقستاندىقتار اۋەجايدىڭ جۇك قويماسى بولىگىندە بولىپتى.

بۇل تۋرالى tengrinews.kz تىلشىسىنە كۋاگەرلەردىڭ ءبىرى حابارلادى. ول ءبىرىنشى جارىلىستىڭ الىستا بولعاندىقتان قاتتى ەستىلمەگەنىن ايتتى.

ال اۋەجايدىڭ كىرەبەرىسىندە بولعان ەكىنشى جارىلىستىڭ داۋسى قاتتى شىققان. «ءبىزدىڭ توبىمىزدا 21 ادام بولدى. ءبىز بولگارياعا بالالارمەن مۋزىكالىق كونكۋرسقا ۇشقالى جاتىر ەدىك. ءبىز ءوز جۇگىمىزدى الىپ، وزگەلەردى كۇتىپ تۇردىق. باستاپقىدا شاپالاق سياقتى داۋىس ەستىلدى، كەيىن جارىلىس بولدى. بۇل اۋەجايدىڭ كىرەبەرىسىندە، باقىلاۋ بولىمىندە بولدى. بىت-شىتى شىقتى، قابىرعانىڭ سىلاعى ءتۇستى. قۇدايعا شۇكىر، ەشقايسىمىز جاراقات المادىق»، - دەدى ايەل.

ول ءوز توبىنىڭ Astana music studio-دا اينالىساتىنىن ايتتى. ولار بولگارياعا ساعات تۇنگى ەكىدە ۇشۋى ءتيىس ەدى.

قازىر تۇركيادا ساعات 7.00. كونكۋرس 1-7- شىلدە ارالىعىندا بولادى. توپ ۆوكالمەن اينالىسادى ەكەن. «وقيعا بولعاندا ءبىزدى اۋەجايدان شىعارىپ الىپ كەتىپ، كەتىپ قالۋىمىزدى سۇرادى. وسىدان كەيىن ءبىز قوناق ۇيگە جاياۋ كەلدىك، ول اۋەجايدىڭ ماڭىندا ورنالاسقان. باستاپقىدا ءبىزدى قوناق ۇيگە كىرگىزبەدى، ورىن جوق دەدى. كەيىن قازاقستان كونسۋلدىعى ارالاسقاننان كەيىن بوس بولمەلەر تابىلا كەتتى»، - دەدى ول.

اتاتۇرىك حالىقارالىق اۋەجايىنداعى اۆتوتۇراقتا، شىعابەرىسىندە جانە كىرەبەرىسىندە ءۇش بىردەي جارىلىس بولعان ەدى. وقيعا استانا ۋاقىتىمەن ساعات 01:00 دە بولدى. سوڭعى مالىمەتتەر بويىنشا، تەراكتىدەن 36 ادام قازا تاپتى. شامامەن 60 ادام اۋرۋحاناعا جەتكىزىلگەن. الدىن الا مالىمەت بويىنشا، ىستانبۇلداعى اۋەجايدا شابۋىلدى ەكى لاڭكەس جاساعان، ولار گراناتا لاقتىرعان.