04:29, 29 - ماۋسىم 2016 | GMT +5
تۇركيانىڭ پرەمەر-ءمينيسترى قازاقستانعا رەسەيمەن ارا-قاتىناستى قالىپقا كەلتىرۋگە جاردەمدەسكەنى ءۇشىن العىس ءبىلدىردى
باكۋ. قازاقپارات - تۇركيا پرەمەر- ءمينيسترى بينالي يىلدىرىم قازاقستانعا رەسەيمەن ارا- قاتىناستى قالىپقا كەلتىرۋگە جاردەمدەسكەنى ءۇشىن العىس ءبىلدىردى.
بۇل تۋرالى ب. يىلدىرىم تۇرىكتىك ب ا ق- قا بەرگەن سۇحباتىندا مالىمدەدى، دەلىنگەن Trend اگەنتتىگىنىڭ حابارلاماسىندا.
«حالقىممەن رەسەيمەن قاتىناستاعى ماڭىزدى جاڭالىقتاردى بولىسكىم كەلەدى. ەكى ەل كوشباسشىلارى اراسىنداعى بايلانىس ناتيجەسىن بەردى. ەكى ەل اراسىنداعى مۇز ەرىدى. بۇعان باۋىرلاس ەلدەر - قازاقستان مەن ازەربايجاننىڭ ۇلەسى بار. ولار تۇركيا مەن رەسەيدىڭ ارا- قاتىناسىن قالىپقا كەلتىرۋ ءۇشىن كۇش جۇمسادى. بۇل ەلدەرگە العىسىمىز شەكسىز»، - دەدى ب. يىلدىرىم.
«تۇركيا مەن رەسەي اراسىنداعى قاتىناستاردى قالپىنا كەلتىرۋ ۇدەرىستەرى باستالىپ كەتتى»، - دەپ اتاپ ءوتتى ب. يىلدىرىم.
