كۇيشى داۋلەتكەرەيدىڭ سۋرەتى

استانا. قازاقپارات - بۇل سۋرەت جايلى اڭگىمە كوپ ايتىلادى. كوبى كەلەمەج سوزدەر.

اراسىندا «قازاقتىڭ كرەديت جاپقاننان كەيىنگى قۋانىش تويى» دەيتىندەر دە كەزدەسەدى. وكىنىشتى-اق. بۇگىنگى جازبامىز وسى سۋرەتكە ءھام بەينەلەنگەن كەيىپكەرلەرگە ارنالماق.

الدىمەنەن سۋرەتتىڭ وزىنە توقتالايىق. 1854 -جىلى اكۆارەلگە تۇسىرگەن ي. چەرەدەيەۆ ەسىمدى سۋرەتشى. ۇيىتقى بولعان ورىس جاعرافيا قوعامىنىڭ وكىلى، ەتنوگراف تەودور پاۋلي. ال جاريالانۋى 1862 -جىلى، پەتەربوردان شىققان «رەسەي حالىقتارىنىڭ سيپاتتاماسى» كىتابى بولسا كەرەك.

سۋرەتتە داۋلەتكەرەيدىڭ كيىز ءۇيىنىڭ ءىشى بەينەلەنگەن. ءيا، ءيا، اتاقتى داۋلەتكەرەي كۇيشى. حالىق اراسىندا «باپاس» اتانعان، ا. جۇبانوۆ «تورە كۇيلەردىڭ اتاسى» دەپ اتاپ كەتكەن تورەنىڭ تۇقىمى.

ءوزى ورتادا مالداس قۇرىپ، دومبىرا تارتىپ وتىر. وڭ جاعىنداعى سىبىزعىشىنىڭ ەسىمى شوگە. ول 66 جاستا. ارتىندا ورامال تاعىپ، كۇيگە قۇلاق ءتۇرىپ تۇرعان داۋلەتكەرەيدىڭ ايەلى سارجان. ەسىك جاقتا باپاستىڭ بەل بالاسى ازاماتكەرەي قىمىز ساپىرىپ وتىر. توردە قىمىز ءىشىپ وتىرعان كوشەعالي شىعاي ۇلى. جانىندا تۇرەگەپ تۇرعان ءانشى ءالنياز. تەك ءبيشىنىڭ ەسىمى عانا بەلگىسىز.

رۇستەم نۇركەنوۆ، gonzo.kz