بايان ەسەنتايەۆاعا قاتىستى وقيعا تۇرمىستىق زورلىق-زومبىلىق پروبلەماسىن اشىق كورسەتتى - مەملەكەتتىك حاتشى
بۇگىن ق ر باس پروكۋراتۋراسىندا وتكەن تۇرمىستىق زورلىق- زومبىلىق پروفيلاكتيكاسىنا ارنالعان ۆەدومستۆوارالىق كەڭەستە مەملەكەتتىك حاتشى گۇلشارا ءابدىقالىقوۆا وسىلاي ءمالىم ەتتى.
«بىلتىرعى جىلى مۇعالىم سۆەتلانا سادۋوۆانى كۇيەۋى ورتەپ جىبەرگەن ەدى. بۇل وقيعا قوعامدا ۇلكەن رەزونانس تۋدىردى. سونداي-اق، تانىمال پروديۋسەر بايان ەسەنتايەۆاعا قاتىستى وقيعا تۇرمىستاعى زورلىق-زومبىلىق پروبلەماسىن اشىق كورسەتتى. سوندىقتان دا، بۇنداي پروبلەمالارعا قاتىستى ەلىمىزدەگى قابىلدانعان زاڭدارعا وزگەرىستەر ەنگىزۋ ماسەلەسىن قاراستىرۋىمىز كەرەك»، - دەدى مەملەكەتتىك حاتشى.
ونىڭ ايتۋىنشا، بۇگىنگى قوعام ايەلدەردى قورعاۋدا قاۋقارسىزدىق تانىتىپ وتىر. «ويتكەنى، ايەلدەردىڭ باسىم جاعدايدا جەرگىلىكتى پوليتسيا قىزمەتىنە بارىپ شاعىمدانبايدى. ال ءجابىر كورسەتۋشى دە، جالپى قوعامدىق مورال دا كوبىنەسە مۇنداي زورلىقشىلىقتى قىلمىس سانامايدى. كەيدە پوليتسيا قىزمەتكەرلەرى قاجەتتى ماتەريالدى دا تاپپايدى، ويتكەنى سول ايەلدەردىڭ ءوزى تۇرمىستىق زورلىق-زومبىلىققا ۇشىراعانىن، زورلىقتىڭ قۇربانى بولعانىن جاسىرادى»، - دەدى گ. ءابدىقالىقوۆا.
مەملەكەتتىك حاتشى سونىمەن بىرگە، تۇرمىستىق زورلىق-زومبىلىقتىڭ پروفيلاكتيكاسى سالاسىنداعى زاڭنامانى جەتىلدىرۋ جۇمىستارىنىڭ ماڭىزدىلىعىن دا اتاپ ءوتتى. «زاڭ بارلىق تۇرعىندارعا تۇسىنىكتى بولۋى جانە ءار ادام ءۇشىن قالىپتى نورما بولۋى ءۇشىن قىزمەت ەتۋ كەرەك. ءبىز ايەل ادامدارعا مەديتسينالىق، قۇقىقتىق، پسيحولوگيالىق كومەك كورسەتۋ جونىندە مەملەكەتتىك كەپىلدىكتەردى نىعايتۋ ماسەلەلەرىنە مەيلىنشە نازار اۋدارۋعا ءتيىسپىز»، - دەدى ول.
اۆتور: قانات مامەتقازى ۇلى
