بايقاۋدا جەڭىسكە جەتكەن جۋرناليستەرگە قورعانىس ءمينيسترىنىڭ اتىنان ديپلومدار تابىس ەتىلدى
«KADEX-2016» كورمەسىن بۇقارالىق اقپارات قۇرالدارىندا تاراتۋدىڭ ۇزدىگى بايقاۋىنىڭ جەڭىمپازدارىنا ارنايى ديپلومدار تابىس ەتىلدى، دەپ حابارلادى قورعانىس مينيسترلىگىنىڭ باسپا ءسوز قىزمەتى.
قورعانىس مينيسترلىگى «KADEX-2016» 4- حالىقارالىق قارۋ-جاراق پەن اسكەري مۇلىك كورمەسىن وتكىزۋ اياسىندا بۇقارالىق اقپارات قۇرالدارىندا تاراتىلعان ۇزدىك ماتەريالدارعا بايقاۋ جاريالاعانم بولاتىن.
قازاقستاننىڭ قالالىق جانە رەسپۋبليكالىق بۇقارالىق اقپارات قۇرالدارى اراسىندا، سونداي-اق ەلەكتروندىق بۇقارالىق اقپارات قۇرالدارى اراسىندا مەملەكەتتىك جانە ورىس تىلدەرىندە جەكە اتالىمدار بويىنشا بايقاۋ ءوتتى.
بۇل بايقاۋعا «KADEX» IV حالىقارالىق قارۋ-جاراق پەن اسكەري مۇلىك كورمەسى تۋرالى ماتەريالدارىن باسپا بەتتەرىندە جاريالاپ جۇرگەن گازەت، راديو جانە تەلەديدار جۋرناليستەرى، اقپاراتتىق اگەنتتىكتەر مەن شتاتتان تىس اۆتورلار قاتىستى.
كورمەنىڭ وقيعالارىن تاراتۋ، كورمەنى وتكىزۋ كەزەڭى، سونداي-اق ونى وتكىزۋ قورىتىندىسى بويىنشا ماتەريالدار بايقاۋ جۇمىستارىنا ارقاۋ بولدى.
بايقاۋدىڭ قورىتىندىسى بويىنشا جەڭىمپازدار: «باسپا باسىلىمدارىنداعى ۇزدىك جاريالانىم» اتالىمى بويىنشا - «ۆرەميا» گازەتىنىڭ ءتىلشىسى لەيلا تاستانوۆا، «ۇزدىك تەلەسيۋجەت/تەلەباعدارلاما» - «حابار» اگەنتتىگىنىڭ ءتىلشىسى ماقپال مادياروۆا، «ەۆرازيا ءبىرىنشى ارناسىنىڭ» ءتىلشىسى ولجاس نۇرەكەنوۆ، «ۇزدىك راديو سيۋجەت/راديو باعدارلاما» اتالىمىندا جۋرناليست ءمادينا يشانوۆا جانە «استانا راديوسىنىڭ» جۋرناليستى ولگا اسحوجينا، «ينتەرنەتتەگى ۇزدىك جاريالانىم» اتالىمى بويىنشا «Bnews» ءتىلشىسى داۋرەن ەربولاتوۆ ماراپاتتالدى. اسكەري تاقىرىپتى تاراتۋدا قوسقان ۇلەسى، بەلسەندى ۇستانىمى مەن وبەكتيۆتىلىگى جانە جوعارى كاسىپقويلىعى ءۇشىن «ەگەمەن قازاقستان» گازەتىنىڭ باس رەداكتورى جانبولات اۋىپبايەۆ، «كازاحستانسكايا پراۆدا» گازەتىنىڭ باس رەداكتورى تاتيانا كوستينا، «كازاحستانسكايا پراۆدا» گازەتىنىڭ ءتىلشىسى دۋلات مولدابايەۆ، «قازينفورم» حالىقارالىق اقپاراتتىق اگەنتتىگى باس ديرەكتوردىڭ ورىنباسارى قالامقاس ءابۋوۆا، بلوگەرلەر قانات اۋەسباي، ەۆگەني پەريەۆەرزيەۆ ناگرادتالدى.
«مەن «قازاقستان پاراماۋنت ينجينيرينگ» زاۋىتى جونىندە جازدىم. بارلىعىن ءوز كوزىممەن كوردىم. مەنى تاڭعالدىرعان زاۋىتتىڭ قۋاتى، ياعني ءبىر اينالىمنىڭ اياقتالۋى بولدى: ءونىمنىڭ كىشكەنتاي بولشەگىن قۇراستىرعان ساتىنەن باستاپ پوليگونعا جىبەرىلگەنگە دەيىنگى كەزەڭدى كوردىم. سول اسەردەن وسى ماتەريال جازىلدى. بۇگىنگى العان ديپلوم سول ەڭبەگىمنىڭ جەمىسى»، - دەدى سەمينارعا قاتىسۋشى لەيلا تاستانوۆا.
ماتەريالداردىڭ ساپاسى ءتۇرلى شارت بويىنشا، اتاپ ايتقاندا - تاقىرىپتىڭ وزەكتىلىگى مەن ماڭىزدىلىعى، تاقىرىپتىڭ ءدال مازمۇندالۋى مەن ونى تەرەڭ اشىلۋى، سالىستىرمالى اقپاراتتىق، ستاتيستيكالىق جانە ناقتى تالداۋ دەرەكتەرىن پايدالانۋى ەسكەرىلگەنىن ايتا كەتكەن ءجون.
