پرەزيدەنت اكىمشىلىگىن باسقارعانداردىڭ قايسىسى حالىق ەسىندە قالدى؟

استانا. قازاقپارات - اقوردادا ءىرى كادرلىق اۋىس-تۇيىستەر ورىن الدى. لاۋازىمدى تۇلعالاردىڭ ساياسي ساحناداعى ورىن الماستىرۋىن ساراپشىلار ءارتۇرلى بولجامدارمەن بايلانىستىردى.

بىرەۋلەر بۇل تەك ساياسي ويىن عانا دەسە، ەندى بىرەۋلەر حالىق سەنىمىنىڭ ازايىپ كەتكەندىگىن العا تارتۋدا دەپ جازادى juldizdar.kz سايتى.

راسىندا دا، پرەزيدەنت اكىمشىلىگى سەكىلدى ورگاننىڭ حالىق اراسىندا اتى دا كوپ اتالمايدى، ىستەگەن قىزمەتى دە اسا بايقالمايتىنىن اتاپ ءوتۋ كەرەك. الايدا، ەلدەگى، ساياساتتاعى ءىرى وزگەرىستەر مەن شارالاردىڭ كوبى وسى ورگان ارقىلى وتەتىنىن ۇمىتپاۋىمىز كەرەك.

ءار جىلدارى اكىمشىلىك جەتەكشىلەرىنىڭ قاتارىنان ءارقيلى تۇلعالاردى كورىپ باقتىق. ءاليحان بايمەنوۆ، اسلان مۋسين، كارىم ءماسىموۆ، يمانعالي تاسماعامبەتوۆ، نۇرلان نىعماتۋلين، ادىلبەك جاقسىبەكوۆ، سارىباي قالمىرزايەۆ، ورالباي ابدىكارىموۆ، ساعىنبەك تۇرسىنوۆ، احمەتجان ەسىموۆ، نۇرتاي ابدىقايەۆ، قايرات كەلىمبەتوۆ... بۇلاردىڭ قاي قايسىسى دا قازاقستاننىڭ ساياسي ەليتاسىنداعى وتە سالماقتى تۇلعالار.

اسلان مۋسيننىڭ جۇمىس اتقارعان ۋاقىتى ءالى ەسىمىزدە. ءدال سول جىلدارى رىسقاليەۆتەردىڭ ءىستى بولۋى ۇلكەن داۋعا اينالىپ، ارتىنشا ەلباسى مۋسيندى ەلشى قىلىپ، شەتەلگە جىبەرەدى.

كارىم ماسىموۆتىڭ قىزمەتى دە ايتارلىقتاي جارقىن ىستەرمەن ەستە قالمادى. حالىق اراسىندا ماسىموۆتىڭ كانديداتۋراسىن جاقتاۋشىلاردىڭ پايىزى تومەن ەكەندىگى داۋسىز سەكىلدى.

پرەزيدەنت اكىمشىلىگىنىڭ حالىقپەن جۇمىس جاساۋى كۇشەيگەن كەز - جەتەكشى قىزمەتىنە ءاليحان بايمەنوۆتىڭ تاعايىندالعان ۋاقىتى. اكىمشىلىككە كەلىپ تۇسكەن حاتتارعا كوپ كۇتتىرمەي جاۋاپ بەرۋ ءۇردىسى پايدا بولدى.

ادىلبەك جاقسىبەكوۆ جۋىردا بۇل قىزمەتكە قايتا تاعايىندالدى. استانا اكىمى قىزمەتىن اتقارعان شاعىندا ەلوردالىقتاردىڭ بىتپەيتىن نارازىلىقتارىنا كۋا بولىپ ەدىك. اكىمشىلىك باسقارعانداعى ىستەرى حالىق جادىندا ساقتالا دا قويمادى.



ەندىگى كەزەك پارلامەنت ءماجىلىسىنىڭ ءتوراعاسى بولىپ تاعايىندالعان نۇرلان نىعماتۋليندە. راسىن ايتۋ كەرەك، نىعماتۋلين سەكىلدى ءىرى ساياساتكەردىڭ جۇمىستارى ەل ىشىندە كەڭىنەن تالقىلانبادى. ءبىردى-ەكىلى باسپا ءسوز بەتتەرىندە ول تۋرالى ماقالالاردى كورىپ قالامىز.

يمانعالي تاسماعامبەتوۆ... بىردەن اتاپ ءوتۋ كەرەك، تاسماعامبەتوۆ بۇل قىزمەتكە كەلگەسىن پرەزيدەنت اكىمشىلىگىندە بۇرىن-سوڭدى بولماعان ءىرى قايتا قۇرۋلار باستالدى. اكىمشىلىك بىرنەشە باعىتتا جۇمىس جۇرگىزۋ رەجيمىنە كوشتى. ءتورت فۋنكتسيونالدى باسقارما قۇرىلدى (ىشكى ساياسات، ۇيىمداستىرۋ-باقىلاۋ جۇمىستارى مەن كادرلىق ساياسات، ەكونوميكالىق ساياسات پەن مەملەكەتتىك قۇقىقتىق ساياسات). ونىڭ ناتيجەسى 2004-جىلعى پارلامەنت سايلاۋىندا بايقالدى.