سەناتورلار ۇكىمەتكە اۋىل شارۋاشىلىعى جانە ازىق- تۇلىك مينيسترلىگىن قۇرۋدى ۇسىندى

استانا. قازاقپارات - اۋىل شارۋاشىلىعى مينيسترلىگىن اۋىل شارۋاشىلىعى جانە ازىق-تۇلىك مينيسترلىگى ەتىپ قايتا قۇرۋ قاجەت.

بۇگىن پارلامەنت سەناتىنىڭ جالپى وتىرىسىندا دەپۋتات قۋانىش ايتاحانوۆ وسى ماسەلەنى كوتەردى.

سەناتوردىڭ پىكىرىنشە، قازاقستاننىڭ ەاەو اياسىندا جانە د س ۇ- عا كىرۋىنە بايلانىستى اۋىل شارۋاشىلىعى سالاسىنىڭ تيىمدىلىگىن ارتتىرۋ كەزەك كۇتتىرمەيتىن ماسەلە بولىپ وتىر. بۇل باعىتتاعى جۇمىسقا مەملەكەت تاراپىنان كەشەندى قولداۋ شارالارى قاجەت. «ۇكىمەت اگروونەركاسىپ كەشەنىنىڭ ءبىرقاتار باعىتىن قولداۋى كەرەك دەپ ەسەپتەيمىز. ونىڭ ىشىندە، اۋىل شارۋاشىلىعى ماشينالارىن جاساۋ، اۋىل شارۋاشىلىعى بانكىن اشۋ، كوپەراتسيانى دامىتۋ ارقىلى اگروسەكتوردىڭ ونىمدىلىگى مەن تيىمدىلىگىن ارتتىرۋ وزەكتى. بۇدان بولەك، وندىرىلگەن ءونىمدى دايىنداۋ، ساقتاۋ، تاسىمالداۋ، ساتۋ ماسەلەسى دە ماڭىزدى. تاماق ونەركاسىبىن دامىتۋ ارقىلى ازىق- تۇلىك ونىمدەرىنىڭ مولشىلىعىن جاساپ، ونى ەكسپورتتاۋ ارقىلى ەل قازىناسىن تولتىرۋعا ءتيىسپىز. وسى باعىتتا كەشەندى باعدارلاما قابىلدانسا يگى»، - دەيدى ق. ايتاحانوۆ.

بۇدان بولەك، دەپۋتات اۋىل شارۋاشىلىعىنىڭ الەۋەتى بولىپ ەسەپتەلەتىن سۋارمالى جەرلەردى تولىق ءارى ءتيىمدى پايدالانۋ ماسەلەسىن دە العا تارتتى. ونىڭ ايتۋىنشا، بۇل ماقساتتا رەسپۋبليكالىق بيۋدجەت پەن حالىقارالىق قارجى ينستيتۋتتارىنان قاراجات تارتىپ، اينالىمنان شىعىپ قالعان جەرلەردى، قولدانىستاعى جەرلەردى قالپىنا كەلتىرۋ قاجەت. «اۋىلدا حالقىمىزدىڭ 43 پايىزى تۇرادى. اۋىلدى دامىتپاي، اۋىل شارۋاشىلىعىن دامىتۋ دا مۇمكىن ەمەس. سوندىقتان دا، ەلدى مەكەندەردى دامىتۋ باعدارلاماسىن قابىلداپ، ىسكە اسىرعان ءلازىم. اۋىلداعىلاردىڭ ءومىر ساپاسىنىڭ ەڭ تومەنگى مەملەكەتتىك ستاندارتتارى تۋرالى زاڭ قابىلداۋدى ۇسىنامىز»، - دەدى سەناتور.

بۇدان باسقا، دەپۋتات ق. ايتاحانوۆ ازىق- تۇلىك باعاسىنىڭ ءوسۋى مەن ەلىمىزگە ساپاسىز ونىمدەردىڭ كەلۋىنە توسقاۋىل قويىپ، حالىقتى ساپالى ونىممەن قامتۋ ماسەلەسىنە دە ۇكىمەتتىڭ نازارىن اۋداردى. «بۇل رەتتە اۋىل شارۋاشىلىعى مينيسترلىگىنە تاماق ونەركاسىبىن دامىتۋ، اۋىل شارۋاشىلىعى ونىمدەرىن دايىنداۋ، ساتۋ، ەكسپورتتاۋ، باعاسىن ۇيلەستىرۋ سەكىلدى ماسەلەلەردى جۇزەگە اسىرۋ ءۇشىن تولىق قۇزىرەت بەرىلۋى قاجەت. ول ءۇشىن اۋىل شارۋاشىلىعى مينيسترلىگىن اۋىل شارۋاشىلىعى جانە ازىق- تۇلىك مينيسترلىگى ەتىپ قايتا قۇرۋ ماسەلەسى قاراستىرىلسا»، دەدى سەناتور. بۇل رەتتە دەپۋتات اتالعان جۇمىس ءبىرقاتار شارالاردى، قارجىنى تالاپ ەتەتىنىن ايتا كەلە، ەكونوميكانىڭ كۇرەتامىرى سانالاتىن اۋىل شارۋاشىلىعىن دامىتۋ ەلدىڭ شيكىزاتقا تاۋەلسىزدىگىن ارتتىراتىنىنا سەنىممەن قارايتىنىن جەتكىزدى.

دەپۋتاتتىڭ كوتەرگەن ماسەلەسىنە سەناتور ت. ابايدىلدين، ي. ادىربەكوۆ، ە. استايەۆ، ب. ءايتىموۆا، م. بورتنيك، م. باقتيار ۇلى، ن. ورازالين، ج. نۇرعاليەۆ جانە تاعى دا باسقالارى قولداۋ ءبىلدىردى.

اۆتور: قانات مامەتقازى ۇلى