سۋبسيدياعا قاتىستى قاعيدا جىل سوڭىنا دەيىن وزگەرمەيدى - ا. مىرزاحمەتوۆ

استانا. قازاقپارات - سۋبسيدياعا قاتىستى ەسكى قاعيدالار جىل سوڭىنا دەيىن وزگەرمەيدى. بۇل تۋرالى بۇگىن ق ر پرەمەر-ءمينيسترىنىڭ ورىنباسارى-اۋىل شارۋاشىلىعى ءمينيسترى اسقار مىرزاحمەتوۆ الماتى وبلىسىنداعى ەسەپتىك كەزدەسۋىندە ءمالىم ەتتى.

ەسەپتىك كەزدەسۋگە رەسپۋبليكانىڭ وبلىستىق جانە اۋداندىق اكىمدىكتەرى بەينە كونفەرەنتسيا بايلانىسى رەجيمىنە قوسىلا وتىرىپ، قوعام وكىلدەرى دە قاتىستى.

مينيستر ءسوز اراسىندا اۋىل شارۋاشىلىعى سالاسىنداعى سۋبسيديالاۋ ماسەلەسىنە توقتالا كەلە، ونداعى قاعيدالاردىڭ جىل سوڭىنا دەيىن وزگەرمەيتىنىن ءمالىم ەتتى. ونىڭ ايتۋىنشا، قازىرگى كۇنى ءتيىمسىز سۋبسيديالاردىڭ كۇشىن جويىپ، ءتيىمدى تۇرلەرىنە كوشۋ بويىنشا ۇسىنىستار ازىرلەۋ جۇمىستارى جۇرگىزىلۋدە. وسى ماقساتتا مينيسترلىك ءماجىلىس دەپۋتاتتارى، بيزنەس جانە عىلىمي قاۋىمداستىقپەن، قوعامدىق ۇيىمدار وكىلدەرىنىڭ، سونداي-اق اكىمدىكتەر مەن باسقا دا مەملەكەتتىك ورگانداردىڭ قاتىسۋىمەن جۇمىس توبىن قۇرعان.

بۇدان بولەك، «اگروبيزنەس-2020» باعدارلاماسى اياسىندا جىل سايىن اگروونەركاسىپ كەشەنىن مەملەكەتتىك قولداۋ كولەمى ۇلعايۋدا. اتاپ ايتقاندا، 2015-جىلى اگروونەركاسىپ كەشەنىن سۋبسيديالاۋ كولەمى 173,3 ميلليارد تەڭگەنى قۇراپ، كورسەتكىش 2014-جىلعا قاراعاندا 18,1 پايىزعا ارتقان. ال 2016-جىلى ا و ك- ءنى مەملەكەتتىك قولداۋ كولەمى 182,7 ميلليارد تەڭگە دەڭگەيىندە جوسپارلانىپ وتىر.

اۆتور: قانات مامەتقازى ۇلى