ءماجىلىس ءتوراعاسى لاۋازىمىنا ن. نىعماتۋليننىڭ كانديداتۋراسى ۇسىنىلدى

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا باقتىقوجا ىزمۇحامبەتوۆتىڭ وتستاۆكاسىنان كەيىن جاڭا ءتوراعا لاۋازىمىنا دەپۋتات ن. نىعماتۋليننىڭ كانديداتۋراسى ۇسىنىلدى.

دەپۋتاتتار جاڭا ءتوراعانى جاسىرىن داۋىس ارقىلى سايلاۋعا كىرىستى. ايتا كەتەرلىگى، سايلاۋعا قاتىستى جاسىرىن داۋىستاردى ساناۋ ءۇشىن جەتى دەپۋتاتتان تۇراتىن ساناق كوميسسياسى قۇرىلعان بولاتىن.

ق ر كونستيتۋتسياسىنا سايكەس، ق ر پارلامەنتى ءماجىلىسىنىڭ ءتوراعاسى مەملەكەتتىك ءتىلدى ەركىن مەڭگەرگەن، ءماجىلىس دەپۋتاتتارىنىڭ اراسىنان پالاتا دەپۋتاتتارى جالپى سانىنىڭ كوپشىلىك داۋىسىمەن جاسىرىن داۋىس بەرۋ ارقىلى سايلانادى. ءماجىلىس ءتوراعاسىنىڭ قىزمەتىنە كانديداتۋرانى پالاتا دەپۋتاتتارى ۇسىنادى. وسىعان بايلانىستى دەپۋتات قۋانىش سۇلتانوۆ ءماجىلىس سپيكەرى لاۋازىمىنا ن. نىعماتۋليننىڭ كانديداتۋراسىن ۇسىندى.

«ن. نىعماتۋليننىڭ تولىق ءومىربايانى تاۋەلسىزدىگىمىزدىڭ وركەندەۋىمەن تىكەلەي بايلانىستى. بارلىق قىزمەتتەرىن ساناماعاننىڭ وزىندە قاراعاندى وبلىسىنىڭ اكىمى، «نۇر وتان» پارتياسى ءتوراعاسىنىڭ ءبىرىنشى ورىنباسارى، ءماجىلىس ءتوراعاسى، پرەزيدەنت اكىمشىلىگىنىڭ باسشىسى لاۋازىمدارىن ەسكە تۇسىرسەك تە جەتكىلىكتى»، - دەدى دەپۋتات ق. سۇلتانوۆ. وسىلايشا، دەپۋتاتتار اراسىنان ءماجىلىس ءتوراعاسى لاۋازىمىنا ءبىر عانا كانديدات ۇسىنىلىپ، ول بويىنشا دەپۋتاتتار جاسىرىن داۋىس بەرۋ ارقىلى سايلاۋعا كىرىستى.

ەسكە سالا كەتەيىك، كەشە ەلباسى نۇرسۇلتان نازاربايەۆ قازاقستان رەسپۋبليكاسى پارلامەنتى ءماجىلىسىنىڭ «نۇر وتان» پارتياسى فراكسياسىنىڭ جينالىسىندا پارلامەنت ءماجىلىسىنىڭ ءتوراعاسى لاۋازىمىنا ن. نىعماتۋليننىڭ كانديداتۋراسىن قاراستىرۋ تۋرالى ۇسىنىس جاساعان بولاتىن.

«بارشاڭىز نۇرلان زايروللا ۇلىن جاقسى بىلەسىزدەر. ول قاراعاندى وبلىسىنىڭ اكىمى، «نۇر وتان» پارتياسى ءتوراعاسىنىڭ ءبىرىنشى ورىنباسارى بولىپ جۇمىس ىستەدى. سوڭعى جىلدارى ءماجىلىستىڭ V شاقىرىلىمىن باسقارىپ، كوبىڭىزبەن بىرگە ەڭبەك ەتتى. ونىڭ پرەزيدەنت اكىمشىلىگىندەگى ەكى جارىم جىل ىستەگەن قىزمەتى پرەزيدەنت سايلاۋى، ءماجىلىس جانە بارلىق دەڭگەيدەگى ءماسليحاتتار سايلاۋى سياقتى قاۋىرت ساياسي كەزەڭدەرگە سايكەس كەلدى. ەلىمىز ءۇشىن اۋقىمدى ساياسي جۇمىستار جۇرگىزىلدى. سايلاۋلار جوعارعى دەڭگەيدە ۇيىمداستىرىلىپ، جاقسى باعاعا يە بولدى. حالقىمىز ىنتىماعىن كورسەتىپ، ءبىزدى قولدادى. سوندىقتان جۇمىستى ودان ءارى جالعاستىرۋىمىز قاجەت»، - دەدى قازاقستان پرەزيدەنتى.

اۆتور: قانات مامەتقازى ۇلى