ق ر پرەزيدەنتىنىڭ ب ا ق سالاسىنداعى سىيلىعىن تاعايىنداۋ - جۋرناليستەر ەڭبەگىنە لايىقتى باعا بەرۋدىڭ يگىلىكتى شاراسى

استانا. قازاقپارات - بۇگىن اقوردادا ق ر مەملەكەتتىك حاتشىسى گۇلشارا ءابدىقالىقوۆانىڭ توراعالىعىمەن ق ر پرەزيدەنتىنىڭ بۇقارالىق اقپارات قۇرالدارى سالاسىنداعى سىيلىعىن تاعايىنداۋ، گرانتتارىن تاپسىرۋ جانە العىسىن جاريالاۋ جونىندەگى قوعامدىق كوميسسيانىڭ وتىرىسى ءوتتى.

«بۇقارالىق اقپارات قۇرالدارى سالاسىنداعى پرەزيدەنتتىڭ سىيلىعىن تاعايىنداۋ، گرانتتارىن تاپسىرۋ جانە العىسىن جاريالاۋ جۋرناليستەر ەڭبەگىنە لايىقتى باعا بەرۋدىڭ يگىلىكتى شاراسى دەپ ويلايمىز. وزدەرىڭىزگە بەلگىلى، جىل سايىن كونكۋرستىڭ دەڭگەيى ارتىپ كەلە جاتىر، قاتىسۋشىلاردىڭ سانى دا ارتۋ ۇستىندە»، - دەدى وتىرىستى اشقان مەملەكەتتىك حاتشى.

گ. ءابدىقالىقوۆا ءوز سوزىندە «قازاقستان-2050» ستراتەگياسىنىڭ ماڭىزدىلىعى مەن ءمانىن، «ماڭگىلىك ەل» جالپى ۇلتتىق يدەياسىنىڭ قۇندىلىقتارىن حالىققا جەتكىزۋ، تەرەڭ ءتۇسىندىرۋ جۇمىستارىنداعى بۇقارالىق اقپارات قۇرالدارىنىڭ ءرولىن ايرىقشا اتاپ ءوتتى.

«سوندىقتان ەلباسى نۇرسۇلتان ءابىش ۇلى نازاربايەۆ وتاندىق اقپارات سالاسىنىڭ دامۋىنا ايىرىقشا كوڭىل ءبولىپ كەلەدى. بيىل ەلىمىز ءۇشىن ەرەكشە جىل. تاۋەلسىزدىگىمىزدىڭ 25 جىلدىعىن اتاپ وتەمىز. ارينە، وسى كونكۋرسقا قاتىسۋشىلارعا دا وسىنى ەسكەرىپ، تالاپ قويۋىمىز قاجەت دەپ ويلايمىن. بۇل ماراپاتتى كاسىبي شەبەرلىگىمەن كوزگە تۇسكەن اقپارات قۇرالدارى وكىلدەرى يەلەنەتىن بولادى. وزدەرىڭىز بىلەسىزدەر، پرەزيدەنت سىيلىعى ەڭ ۇزدىك 2 جۋرناليسكە بەرىلەدى جانە پرەزيدەنت گرانتى دا ەڭ ۇزدىك 2 جۋرناليسكە بەرىلەدى. سونىمەن قاتار 4 جۋرناليسكە العىس جاريالاۋدى ۇسىنىپ وتىرمىز»، - دەدى گ. ءابدىقالىقوۆا.

مەملەكەتتىك حاتشىنىڭ اتاپ وتۋىنشە، پرەزيدەنتتىڭ گرانتتارى، سىيلىقتارى مەن العىسىنا ۇمىتكەرلەردەن 78 جۇمىس كەلىپ تۇسكەن.

اۆتور: مارلان جيەمباي