ن. نازاربايەۆ: كەلەسى جىلى استانانىڭ ورمانى بۋرابايعا قوسىلادى
بۇل تۋرالى بۇگىن جاسىل ايماقتاعى ورماندى ارالاي وتىرىپ، مەملەكەت باسشىسى نۇرسۇلتان نازاربايەۆ ءمالىم ەتتى.
ن. نازاربايەۆ اتاپ وتكەندەي، جاسىل ايماق قىزمەتكەرلەرى جىل سايىن بەس مىڭ گەكتار جەرگە تال ەگىپ، ونى كۇتىپ، وسىنداي ورمانعا اينالدىرىپ كەلەدى. ون سەگىز جىل ىشىندە جاسىل بەلدەۋدىڭ كولەمى بۋراباي ۇلتتىق پاركىنىڭ كولەمىمەن تەڭەسكەن ەكەن.
«ەندىگى مىندەت، وسى ورماندى بۋراباي ورمانىنا قوسۋ. قازىر استانانىڭ جاسىل ايماعىنداعى ورمان شورتاندى اۋدانىنا دەيىن ءجۇز شاقىرىمعا جەتتى. ودان كەيىن تاعى شامامەن ءجۇز شاقىرىم بار. كەلەسى جىلى ورمان بۋرابايعا جەتەدى»، - دەپ ءمالىم ەتتى مەملەكەت باسشىسى.
ەلباسى اتاپ وتكەندەي، استانانىڭ جاسىل ايماعى كوكشەتاۋعا عانا ەمەس، پاۆلودار، قاراعاندى، قوستاناي وڭىرلەرىنە دە بويلايدى. وسىلايشا، استانانىڭ اينالاسى نۋ ورمانعا اينالماق.
«قازاقستاننىڭ ءاربىر قالاسى ورمان شارۋاشىلىعىن دامىتسا، ەلىمىز ەكولوگياسى تازا، جاپ- جاسىل ەلگە اينالار ەدى. ورمان دەگەنىمىز قالانىڭ وكپەسى ەمەس پە؟!. ون سەگىز جىل ىشىندە استانانى وسىنشا كوگالداندىردىق. بۇل مەنى قاتتى قۋانتادى. استاناعا ۇشىپ كەلگەن كەز كەلگەن ادام اينالاسى جاپ- جاسىل ورمان ەكەنىن كورەدى»، - دەي كەلە مەملەكەت باسشىسى وسى ورماننىڭ ءار تالىن تەر توگە وتىرىپ باپتاعان جۇمىسشىلارعا زور العىسىن ءبىلدىردى.
اۆتور: كەنجەكەي توقتامۇرات قىزى
