مەكتەپ تابالدىرىعىن العاش اتتايتىن بۇلدىرشىندەرگە تەست تاپسىرۋ قاراستىرىلماعان - ق ر ءبىلىم جانە عىلىم مينيسترلىگى

استانا. قازاقپارات - سوڭعى كەزدە جاڭارتىلعان ءبىلىم مازمۇنىنا بايلانىستى كوپ تالقىلاۋلار جۇرگىزىلىپ، ءتۇرلى پىكىرلەر ايتىلدى.

ەندى مىنە ق ر ءبىلىم جانە عىلىم مينيسترلىگى جاڭارتىلعان ءبىلىم مازمۇنىن ءبىرىنشى سىنىپقا ەنگىزگەلى وتىر. ق ر ءبىلىم جانە عىلىم ۆيتسە- ءمينيسترى ەلميرا سۋحانبەرديەۆا مينيسترلىك «100 ناقتى قادام» ۇلت جوسپارىنىڭ قادامدارىن جانە ءبىلىم مەن عىلىمدى دامىتۋدىڭ 2016-2019 -جىلدارعا ارنالعان مەملەكەتتىك باعدارلاماسىن ىسكە اسىرۋ ماقساتىنداعى ءبىلىم مازمۇنىنا كەزەڭ- كەزەڭمەن كوشۋ جۇمىستارىن باستاعانىن اتاپ ءوتتى.

«اتاپ ايتقاندا، جاڭا وقۋ جىلىنان باستاپ ەلىمىزدىڭ بارلىق مەكتەپتەرىنە نازاربايەۆ زياتكەرلىك مەكتەپتەرىنىڭ تاجىريبەسى بويىنشا جاڭارتىلعان ءبىلىم مازمۇنى ءبىرىنشى سىنىپتان باستاپ ەنگىزىلەدى»، - دەپ اتاپ ءوتتى ە. سۋحانبەردييەۆا ەلوردادا وتكەن باسپا ءسوز ءماسليحاتىندا.

وسى رەتتە ول وقۋشىلاردىڭ فۋنكتسيونالدىق ساۋاتتىلىعىن دامىتۋعا باعىتتالعان جاڭارتىلعان مازمۇن 30 قاناتقاقتى مەكتەپتە سىناقتان تابىستى وتكەنىن ەسكە سالىپ ءوتتى.

بەلگىلى بولعانداي، جاڭارتىلعان ءبىلىم مازمۇنى ارنايى كەستەگە سايكەس كەزەڭ- كەزەڭمەن ەنگىزىلەدى: 2016 جىلى - 1-سىنىپ، 2017 -جىلى - 2,5,7 -سىنىپتار، 2018 -جىلى - 3,6,8,10-سىنىپتار، 2019 جىلى - 4,9,11,12-سىنىپتار. 2020 -جىلعا قاراي 12 جىلدىق قۇرىلىممەن جاڭارتىلعان ءبىلىم مازمۇنىنا كوشۋ بارلىق سىنىپتاردا اياقتالادى.

ءوز كەزەگىندە ق ر  ب ع م مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى جاڭىل جونتايەۆا جاڭا وقۋ جىلىندا 410 مىڭ ءبۇلدىرشىن مەكتەپ تابالدىرىعىن العاش رەت اتتايتىنىن ءسوز ەتتى. وسى رەتتە بۇل بالالارعا جاڭا مازمۇن بويىنشا ءبىلىم الۋ ءساتى ءتۇسىپ تۇر.

«بيىل ءبىرىنشى سىنىپقا 410 مىڭنان استام بالا كەلەدى دەپ كۇتىلۋدە. بارلىق وبلىستاردا اقپاراتتىق ءتۇسىندىرۋ جۇمىستارى، مەكتەپتەردىڭ دايىندىعى بويىنشا مالىمەتتەردى جيناقتاۋ اياقتالۋدا. بۇگىندە مەكتەپتەر دايىن. سونىمەن قاتار قازىرگى كەزدە ۇستازداردى، وقۋلىقتاردى دايارلاۋ شارالارى ءجۇرىپ جاتىر»، - دەدى دەپارتامەنت باسشىسى.

قازىرگى كەزدە ءبىلىم زاڭناماسىنا سايكەس، تامىزدىڭ ورتاسىنا قاراي بارلىق مەكتەپتەرگە وقۋلىقتار جەتكىزىلەدى. وسى رەتتە ءتيىستى كەلىسىمشارتتار بەكىتىلگەن كورىنەدى.

بۇدان بولەك، دەپارتامەنت ديرەكتورى ءبىرىنشى سىنىپقا قابىلداناتىن بۇلدىرشىندەرگە تەست نەمەسە ەمتيحان تاپسىرۋ قاراستىرىلماعانىن اتاپ ءوتتى. «زاڭناماعا سايكەس، 6-7 جاسقا تولعان بالالاردى اتا- انالارى مەكتەپكە ءبىرىنشى سىنىپقا اپارۋعا قۇقىلى»، - دەدى ول.

اتاپ ايتقاندا، جالپى ءبىلىم بەرۋ جۇيەسىندە 325184 پەداگوگ جۇمىس ىستەيدى. 2016 -جىلى كۋرستاردان 91391 مۇعالىم، ونىڭ ىشىندە ءبىلىم مازمۇنىن جاڭارتۋ اياسىندا 69097 ۇستاز وتەدى. ءۇشتىلدى ءبىلىم بەرۋدى ەنگىزۋ كەزىندە بيىل نازاربايەۆ ۋنيۆەرسيتەتى مەن ەلىمىزدىڭ 15 جوعارى وقۋ ورىندارى بازاسىندا بيولوگيا، حيميا، فيزيكا جانە ينفورماتيكا پاندەرىنىڭ 675 مۇعالىمىنە ارنالعان ءتورت ايلىق كۋرستاردى وتكىزۋدى جوسپارلاۋدا. بۇل كۋرستاردىڭ ماقساتى - وقىتۋشىلار اراسىندا اعىلشىن ءتىلىن جەتىلدىرۋ.

جالپى بىلىكتىلىكتى ارتتىرۋعا جىل سايىن 10 ميلليارد تەڭگە بولىنەتىن كورىنەدى. وسى رەتتە بارشا مۇعالىمدەرگە ەسكەرەر جايت، جاڭارتىلعان باعدارلاما بويىنشا بىلىكتىلىكتى ارتتىرۋ ۇستازداردىڭ جەكە قارجىسىنا ەمەس، بيۋدجەت ەسەبىنەن جۇرگىزىلەدى.

ەلميرا سۋحانبەرديەۆا 2017-2019 -جىلدارى ءاربىر جىل سايىن 5200 مۇعالىم اعىلشىن تىلىندە كۋرستارمەن قامتىلاتىنىن جەتكىزدى. بۇگىندە ج و و- دا مۇعالىمدەردى 12 جىلدىق ءبىلىم بەرۋدىڭ جاڭا مازمۇنىنا سايكەس دايىنداۋ باستالدى. وسى ۋاقىتقا دەيىن 42 جوعارى وقۋ ورنىندا 18 مىڭنان استام ستۋدەنت ۇشتىلدىلىك باعدارلاماعا سايكەس ءبىلىم الۋدا.

مەكتەپتەردە 2019 -جىلعا جوسپارلانعان ءۇشتىلدى ءبىلىم بەرۋگە كوشۋ وقۋ ورىندارىنىڭ دايىندىعىنا قاراي ىسكە اسىرىلماق. بۇل تۇرعىدا شامامەن 40 وقۋشى ءبىلىم الىپ جاتقان شالعايداعى ەلدى مەكەندەردەگى شاعىن مەكتەپتەردىڭ جاعدايى ەسكەرىلمەك.

«ءبىز الىستاعى ەلدى مەكەندى (بىلىكتى مۇعالىمدەرمەن) قامتاماسىز ەتە الماساق، وندا بۇل مەكتەپتى 2019 -جىلعا ەمەس، ءبىر جىل كەيىن دايىندايمىز. بارلىق قادامدار دايىندىعىنا قاراي ىسكە اسىرىلادى»، - دەدى ۆيتسە- مينيستر.

اۆتور: رۋسلان عابباسوۆ