يليا يليننىڭ كەشەگى مالىمدەمەسىنە قازاقستاندىقتاردىڭ دەنى وڭ پىكىر ءبىلدىردى
بۇل جايىندا داڭقتى سپورتشى ينستراگرامداعى پاراقشاسىندا جازدى.
«قايىرلى تاڭ قازاقستان!!! كەشە مەن ءوز وتانداستارىمنىڭ ناعىز قولداۋىن سەزىندىم، پوزيتيۆتى پىكىرلەر - 99,9 پايىز. سول ءۇشىن سىزدەرگە زور العىس بىلدىرەمىن. ءبىز بىرگە كۇشپىز! العا قازاقستان!»، - دەدى ي. يلين.
بۇعان دەيىن مانەرلەپ سىرعاناۋشى دەنيس تەن دە يليا يلينگە قولداۋ بىلدىرگەن ەدى.
ايتا كەتەيىك، حالىقارالىق اۋىر اتلەتيكا فەدەراتسياسى (IWF) قازاقستاندىق اۋىر اتلەتتەردىڭ - لوندونداعى 2012 -جىلعى وليمپيادا ويىندارى جەڭىمپازدارىنىڭ دوپينگ- سىنامالارىنىڭ ەكىنشى ساراپتاماسىنىڭ ناتيجەسىنە جاريالاۋىنا وراي يليا يلين كەشە مالىمدەمە جاسادى.
«جەتكەن اقپارات مەن ءۇشىن اشىق كۇندەگى نايزاعايداي اسەر ەتتى. حالىقارالىق اۋىر اتلەتيكا فەدەراتسياسىنىڭ ەرەجەسىنە سايكەس مەن جايىنداعى بارلىق اقپارات «ADAMS» حالىقارالىق جۇيەسىندە تۇر. وندا مەنىڭ ءومىرىمنىڭ ءاربىر ساعاتى جاتتىعۋدان تىس كەزىمدەگى نەمەسە دەمالىس ۋاقىتىمداعى تۇرعىلىقتى جەرىم كورسەتىلە وتىرىپ كەستەلەنگەن. مەن ۇنەمى اشىقپىن جانە دوپينگكە قارسى اگەنتتىكتىڭ باقىلاۋشىلارى ءۇشىن قول جەتىمدىمىن. وسى جىلدىڭ وزىندە مەن جاتتىعۋ جيىنى كەزىندە پولشادا جانە الماتى قالاسىندا 2 رەت دوپينگ باقىلاۋ تاپسىردىم. وزدەرىڭىزدە بىلەتىندەي، بىردە- ءبىر حالىقارالىق جارىس دوپينگ باقىلاۋسىز وتپەيدى. مەندە سپورتشى رەتىندە 2004 -جىلدان بەرى دوپينگ سىناق تاپسىرىپ كەلەمىن. ءار ۋاقىتتا دا دوپينگ انىقتالعان ەمەس»، - دەپ جازدى سپورتشى ينستراگرامداعى پاراقشاسىندا.
سونىمەن قاتار ول ريو وليمپياداسىنا دايىندىعىن جالعاستىرىپ جاتقاندىعىن، بۇل ءىستىڭ اق- قاراسىن سوڭىنا دەيىن انىقتاۋعا باراتىندىعىن اشىق ايتتى. بۇل رەتتە ەلىمىزدىڭ سپورت باسشىلارى دا اتالعان ىسكە ارالاسىپ، وسى ايدىڭ سوڭىنا دەيىن ناقتى ناتيجە بەلگىلى بولاتىندىعىنا ءۇمىت ارتقان.
«شىلدە ايىنىڭ ورتاسىنا دەيىن وليمپياداعا قاتىسۋعا ءوتىنىم بەرۋگە ۇلگەرەتىندەي ۋاقىتىم بار. بىزدەر مەنىڭ اتىما ايتىلعان بارلىق ءجونسىز جانە نەگىزسىز ايىپتاۋلاردا دالەلدەي الامىز دەپ ويلايمىن. ماعان قاتىستى قانداي شەشىم قابىلدانسا دا سىزدەردىڭ ءوزىمىنىڭ شامامەن 20 جىل عۇمىرىمدى كۇنىنە 3 ساعات بويى ماڭدايىمنان تەر شۇمەكتەپ، سپورت زالىندا وتكىزگەنىمدى بىلگەندەرىڭىزدى قالايمىن. مەن ءار ۋاقىتتا دا ءوز ەلىمنىڭ، ءوز حالقىمنىڭ الدىنداعى جاۋاپكەرشىلىكتىڭ موينىما ارتىلعانىن سەزىنەتىنمىن جانە ءارقاشان تەك جەڭىس ءۇشىن ەڭبەكتەندىم. وسى جىلدار بويى سىزدەر قيىن كۇندەرى دە، قۋانىشتى كۇندەردە دە ماعان قولداۋ كورسەتتىڭىزدەر. قازىردە سىزدەر قولداۋ بىلدىرەسىزدەر دەپ ۇمىتتەنەمىن. سىزدەردىڭ يليا يليندەرىڭىز»، - دەپ جازدى داڭقتى سپورتشى.
ايتا كەتەيىك، لوندونداعى 2012 -جىلعى وليمپيادا ويىندارى جەڭىمپازدارىنىڭ دوپينگ- سىنامالارىنىڭ ەكىنشى ساراپتاماسىنىڭ ناتيجەسىندە حالىقارالىق اۋىر اتلەتيكا فەدەراتسياسى قازاقستاندىق سپورتشىلاردىڭ قانىندا تومەندەگى زاتتار تابىلعانىن حابارلادى:
سۆەتلانا پودوبەدوۆا (KAZ) - ستانوزولول (S1.1 انابوليكالىق اگەنتتەر)
مايا مانەزا (KAZ) - ستانوزولول (S1.1 انابوليكالىق اگەنتتەر)
يليا يلين (KAZ) - دەگيدروحلورمەتيلتەستوستەرون، ستانوزولول (S1.1 انابوليكالىق اگەنتتەر)
زۋلفيا چينشانلو (KAZ) - وكساندرولون، ستانوزولول (S1.1 انابوليكالىق اگەنتتەر)
ەرەجەلەرگە سايكەس، دوپينگكە قارسى ەرەجەلەردى بۇزعان سپورتشىلاردى فەدەراتسيا ولاردىڭ ءىسى جابىلعانشا سپورتتان شەتتەتەدى.
اۆتور: مارلان جيەمباي
