اقتوبەدەگى تەراكت كەزىندە پوليتسەيلەر ۇرىس جۇرگىزۋدىڭ تاكتيكاسىن بىلمەگەن
بۇل قيىندىقتار اتالعان سالاداعى كەمشىلىكتىڭ سالدارى بولسا كەرەك.
«5- مامىر كۇنى بولعان لاڭكەستىك وقيعانى بۇگە-شىگەسىنە دەيىن ساراپتاۋ كەزىندە ىشكى ىستەر دەپارتامەنتى قىزمەتىندەگى كەمشىلىكتەردى انىقتادىق. بىرىنشىدەن، ءبىر توپ لاڭكەس قالانىڭ بىرنەشە اۋدانىندا شابۋىل جاساعان كەزدە تويتارىس بەرۋ ءۇشىن ىشكى ىستەر ورگاندارىن باسقارۋدىڭ قيىندىعى بايقالدى. سوندىقتان، لاڭكەستىك وقيعا باستالعان كەزدە ءبىز پوليتسيانىڭ كەشەندى كۇشىن ۇيلەستىرۋدە، وعان جەتەكشىلىك ەتۋدە قيىندىقتارعا تاپ بولدىق. ەكىنشى ماسەلە - جەكە قۇرامنىڭ قالالىق جەردە ۇرىس جۇرگىزۋدىڭ تاكتيكاسىن بىلمەۋى»، - دەدى ماقسۇتحان ءابلازىموۆ.
ءى ءى د باستىعى ارنايى اۆتوبۋستاردىڭ جوقتىعىنان جەكە قۇرامدى قالانىڭ ءبىر بولىگىنەن ەكىنشى بولىگىنە تاسىمالداۋ قيىنعا سوققانىن ايتادى. پوليتسەيلەرگە ءالسىن-ءالسىن اۆتوبۋس سۇراتىپ، اكىمشىلىككە شىعۋعا تۋرا كەلگەن، ال بۇل لاڭكەستەردىڭ شابۋىلىنا تويتارىس بەرۋ وپەراتسياسىنىڭ جەدەلدىگىنە كەرى اسەر ەتكەن.
پاترۋلدىك پوليتسيا قىزمەتكەرلەرى سانى دا جەتكىلىكسىز. وبلىستا جاساقتالعان 630 باعىتتىڭ تەك 34 پايىزى، قالا بويىنشا 20 پايىزى عانا پاترۋلدەرمەن قامتاماسىز ەتىلگەن.
«ەكسترەميزيم جانە تەرروريزممەن كۇرەس جونىندەگى باسقارمانىڭ شتاتتىق كەستەسى تالاپقا ساي ەمەس - 11 ادام! ال ەسەپتە تۇرعان ادامدار سانى 400 دەن اسادى جانە ءداستۇرلى ەمەس ءدىني اعىمدار جەتەگىندە جۇرگەن 1500 دەن استام ادام بار»، - دەدى ول.
ابدەن ەسكىرگەن راديوستانتسيالار دا جارامسىز ەكەنىن كورسەتتى - ءبىر راديوارنادا لاڭكەستىك وقيعا بولعان العاشقى ساعاتتا 500 ادام سويلەگەندە، جۇكتەمەنى كوتەرە الماي قالدى. جولدارعا توسقاۋىل قويۋعا قاجەتتى تەحنيكالىق قۇرالداردىڭ بولماعاندىعى سالدارىنان جولداردا قورعانىس بەكەتتەرىن سالۋ ءۇشىن قاپشىقتارعا قۇم تولتىرىپ قويۋعا تۋرا كەلگەن.
«پوليتسەيلەردىڭ سانىن ارتتىرۋ، كادر ماسەلەسى وبلىس اكىمى جەكە باقىلاۋىنا الدى»، - دەدى ءابلازىموۆ.
