يندۋستريالاندىرۋ باعدارلاماسى بولماعاندا، قازاقستانداعى الەۋمەتتىك جاعداي ۋشىعار ەدى - ارتۋر نىعمەتوۆ

استانا. قازاقپارات - قازاقستاندا يندۋستريالىق- يننوۆاتسيالىق باعدارلاما بولماعاندا، ەلىمىزدەگى الەۋمەتتىك جاعداي ۋشىعار ەدى.

بۇگىن «SaparTime» پىكىرتالاس كلۋبىنىڭ «قازاقستاننىڭ يندۋستريالدى ەكونوميكاسى» اتتى تاقىرىپتا وتكەن وتىرىسىندا پىكىرتالاس كلۋبىنىڭ مودەراتورى ارتۋر نىعمەتوۆ وسىنداي پىكىرىن ءبىلدىردى.

«2010-2014 -جىلدارى قازاقستاندا جۇمىسپەن قامتىلعان 720 مىڭ ادامنىڭ ءاربىر بەسىنشىسى - يندۋستريالاندىرۋ باعدارلاماسىنىڭ ارقاسىندا جۇمىس تاپقان. 2012 -جىلى ەكونوميكانىڭ بارلىق سالاسىندا 112 مىڭ جاڭا جۇمىس ورنى اشىلسا، ونىڭ 30 پايىزى يندۋستريالاندىرۋ باعدارلاماسىنىڭ ارقاسىندا پايدا بولعان جۇمىس ورىندارى. مەنىڭ ويىمشا، باعدارلامانىڭ باستى كورسەتكىشى - وسى»، - دەدى ا. نىعمەتوۆ.

ا. نىعمەتوۆتىڭ ايتۋىنشا، بۇل باعدارلاما ەلىمىزدىڭ الەۋمەتتىك سالاسىنداعى جاعدايدى ۋشىقتىرماي، ەكونوميكالىق جاعدايدىڭ تۇراقتانۋىنا دا ءوز ۇلەسىن قوسقان.

يندۋستريالاندىرۋ باعدارلاماسىنىڭ التى جىلىندا قازاقستان بويىنشا 900 كاسىپورىن اشىلعان. سونىڭ ىشىندە، 21 جوبا توقتاپ قالسا، 13 جوبا پروبلەمالى جوبالار قاتارىندا تۇر.

ا. نىعمەتوۆ اتاپ وتكەندەي، ەندىگى كەزەكتە قازاقستان شاعىن جانە ورتا بيزنەستى دامىتۋعا دەن قويىپ، ءوزىن- ءوزى جۇمىسپەن قامتىپ وتىرعان حالىققا قولداۋ كورسەتۋ كەرەك.