اقتوبەدە ك. ءماسىموۆ لاڭكەستىك كەزىندە اسكەري قىزمەتشىلەر قازا بولعان ورىنعا گۇل شوعىن قويدى
اسكەري ءبولىم اۋماعىندا ك. ءماسىموۆ قاۋىپسىزدىك كەڭەسى وتىرىسىندا مەملەكەت باسشىسى بەرگەن تاپسىرمالاردى ىسكە اسىرۋ ماسەلەلەرى بويىنشا كەڭەس وتكىزدى. شارا لاڭكەستىك قۇرباندارىن ءبىر مينۋت ۇنسىزدىكپەن ەسكە الۋدان باستالدى.
«تاياۋدا ەلىمىز بەيبىت تۇرعىندار مەن اسكەري قىزمەتشىلەر قازا تاپقان قايعىلى جاعدايدى باستان وتكەردى. ءبىز ولاردى ازا تۇتىپ، حالىقتى قورعاۋ ءۇشىن جاندارىن قيعان پوليتسەيلەر مەن اسكەري قىزمەتشىلەردىڭ ەرلىگىن ماقتان تۇتامىز. قۇقىق قورعاۋ ورگاندارىنىڭ ارەكەتى تەرروريزمدى توقتاتتى. وڭىردەگى بەيبىتشىلىك پەن قاۋىپسىزدىكتى قالپىنا كەلتىردى. مەملەكەت باسشىسى اتاپ وتكەندەي، بەيبىتشىلىك، تىنىشتىق پەن قاۋىپسىزدىك - ەلىمىزدىڭ ەڭ ماڭىزدى قۇندىلىعى»، - دەدى ءماسىموۆ.
ۇ ق ك د مەن ءى ءى د باسشىلارى ءماجىلىس بارىسىندا پرەمەر-ءمينيستردى تەرروريزممەن كۇرەس وڭىرلىك جەدەل شتابىنىڭ جۇمىس ناتيجەلەرى مەن حالىقتىڭ قاۋىپسىزدىگى مەن قۇقىقتىق ءتارتىپتى قامتاماسىز ەتۋ بويىنشا قابىلدانعان شارالار جايلى حاباردار ەتتى.
تالقىلاۋ قورىتىندىسىن شىعارعان ك. ءماسىموۆ اقتوبە وبلىسىنداعى جاعداي باقىلاۋدا ەكەنىن مالىمدەدى.
