ك. ءماسىموۆ اقتوبەدەگى تۇرعىن ءۇي قۇرىلىسى باعدارلاماسىن جۇزەگە اسىرۋ بارىسىمەن تانىستى
اقتوبەدە كارىم ءماسىموۆ باتىس-2 شاعىن اۋدانىندا بولىپ، 200 پاتەرلى تۇرعىن ءۇيدىڭ جانە 320 ورىندىق بالاباقشانىڭ قۇرىلىسى بارىسىمەن تانىستى.
بالاباقشا م ج ءا تەتىگى اياسىندا سالىنىپ جاتقانىن ايتا كەتكەن ءجون. مەكتەپكە دەيىنگى مەكەمە جاڭا ويىن قۇرىلىستارىمەن جانە زاماناۋي بالالار جابدىقتارىمەن جابدىقتالادى. جوبانىڭ جالپى قۇنى - 1 ميلليارد تەڭگە.
ءوڭىر باسشىلارى ك. ماسىموۆكە تۇرعىن ءۇي باعدارلاماسى مەن م ج ءا جوبالارىن جۇزەگە اسىرۋ بارىسى تۋرالى مالىمدەدى. وبلىس اكىمدىگىنىڭ مالىمەتىنە سايكەس مەملەكەت باسشىسىنىڭ باستاماسىمەن اعىمداعى جىلى وڭىردەگى تۇرعىن ءۇي قۇرىلىسىنا ۇلتتىق قوردان 19,2 ميلليارد تەڭگە بولىنگەن.
اقتوبە قالاسىنىڭ جۇمىسپەن قامتۋ ورتالىعىن ارالاۋ بارىسىندا پرەمەر- مينيستر «جۇمىسپەن قامتۋدىڭ جول كارتاسى-2020» باعدارلاماسىن جۇزەگە اسىرۋمەن جانە «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ قىزمەتىمەن تانىستى.
بۇدان وزگە، كارىم ءماسىموۆ جەدەل مەديتسينالىق جاردەم اۋرۋحاناسىندا بولىپ، 2016 -جىلعى 5 ماۋسىمدا لاڭكەستىك اكت كەزىندە زارداپ شەككەندەرمەن كەزدەستى. وسىندا پرەمەر- مينيستر لاڭكەستەردىڭ شابۋىلداۋى ناتيجەسىندە جارالانعانداردى قۇتقارۋعا قاتىسقان مەديتسينالىق قىزمەتكەرلەرگە العىسحاتتاردى تابىستادى.
