كورنەكتى جازۋشى ءسابيت دوسانوۆ ماحمۇد قاشقاري اتىنداعى حالىقارالىق سىيلىقتىڭ يەگەرى اتاندى - فوتو
وعان ۋنيۆەرسيتەت باسشىلىعى جانە پروفەسسور-وقىتۋشى قۇرامىمەن قاتار، قازاقستاننىڭ تانىمال اقىن-جازۋشىلارى: مىڭباي ءراش، دۋلات يسابەكوۆ، عالىم جايلىباي، ءازىربايجاننىڭ كورنەكتى اقىنى ەلحان زال قاراحانلى، الماتى قالاسى اكىمدىگىنىڭ جاستار ساياسات باسقارماسىنىڭ باسشىسى نۇربولات سىزدىقوۆ، رەسەي قازاقتارىنىڭ اتىنان دامەلى تاسماعانبەتوۆا جانە دارابوز كۇيشى-كومپوزيتور ءشامىل ابىلتايەۆ قاتىستى.
ءوزىنىڭ العى سوزىندە ءال-فارابي اتىنداعى قاز ۇ ۋ رەكتورى، اكادەميك عالىمقايىر مۇتان ۇلى جازۋشىنىڭ قازاق ادەبيەتىنىڭ دامۋىنا سىڭىرگەن ەڭبەگىن ەرەكشە اتاپ ءوتتى.
«بۇگىنگى كەزدەسۋدىڭ قازاق ادەبيەتىنىڭ كورنەكتى وكىلى، بەلگىلى جازۋشى، دراماتۋرگ ءسابيت دوسانوۆپەن بولۋى كەزدەيسوق ەمەس. ول - ءبىزدىڭ ۋنيۆەرسيتەتتىڭ 1964-جىلعى تۇلەگى. سودان بەرى ول، ءوزى تاڭداعان ءسوز ونەرىندە شىعارماشىلىقتىڭ شىڭىن باعىندىرىپ، ۋنيۆەرسيتەتىمىزدىڭ اتىن تەك جاقسى جاعىنان شىعارىپ جۇرگەن قازاق حالقىنىڭ دارىندى تۇلعاسى» - دەدى ول.
كەزدەسۋ بارىسىندا ماحمۇد قاشقاري اتىنداعى حالىقارالىق قوردىڭ پرەزيدەنتى، ءازىربايجاننىڭ كورنەكتى اقىنى، «شىنار» جۋرنالىنىڭ باس رەداكتورى ەلحان زال قاراحانلى ءسابيت دوسانوۆقا «اق ارۋانا» شىعارماسى ءۇشىن ماحمۇد قاشقاري اتىنداعى حالىقارالىق سىيلىقتى تابىستادى.
سونىمەن قاتار، ەكى ەل اراسىنداعى تۋىستىق قارىم-قاتىناستى اتاپ ءوتىپ، ءوزىنىڭ «ءازىربايجان مەن قازاقستان» اتتى ولەڭىن وقىپ بەردى.
ءال-فارابي اتىنداعى قاز ۇ ۋ باسپا ءسوز قىزمەتىنىڭ حابارلاۋىنشا، ەلحان زال قاراحانلى «شىنار» جۋرنالىنىڭ باستى بەتىن ءسابيت دوسانوۆقا ارناپ، ونىڭ «اق ارۋانا» كىتابىن ءازىربايجان تىلىنە اۋدارعان.
ايتا كەتەلىك، ماحمۇد قاشقاري اتىنداعى حالىقارالىق قور جۇمىسىنىڭ باستى ماقساتى - تۇركى حالىقتارىنىڭ مادەنيەتى مەن ادەبيەتىن بۇكىل الەمگە تاراتۋ، جەر بەتىندەگى بارلىق حالىقتار اراسىنداعى قارىم-قاتىناستى نىعايتۋ. ماحمۇد قاشقاري اتىنداعى سىيلىق وسى ماقساتقا جەتۋگە ءوز شىعارمالارى مەن ەڭبەكتەرى ارقىلى ادەبيەت، عىلىم مەن ونەر سالاسىندا ۇلەس قوسىپ جۇرگەن ازاماتتارعا بەرىلەدى. مۇنداي بەدەلدى سىيلىقپەن بۇدان بۇرىن قازاقتىڭ كورنەكتى اقىندارى اقىلبەك شاياحمەت پەن ولجاس سۇلەيمەنوۆ ماراپاتتالعان بولاتىن.
