رەسەيلىكتەر ارنايى دايىندىقتان وتكەن بۇزاقىلاردى ەۋروپا چەمپيوناتىنا الىپ بارعان

استانا. قازاقپارات - فرانتسيانىڭ مارسەل پروكۋراتۋراسى 11- ماۋسىمدا اعىلشىن فۋتبول جانكۇيەرلەرىمەن توبەلەسكە ارنايى دايىندىقتان وتكەن 150 رەسەيلىك بۇزاقىنىڭ قاتىسقانىن ايتادى دەپ جازادى centralasian.org.

Associated Press اگەنتتىگىنىڭ حابارلاۋىنشا، پروكۋرور بريس روبين قالانىڭ كوپ بولىگىنىڭ بۇزىلۋىنا سولار كىنالى دەگەن. اعىلشىن جانكۇيەرلەرىنىڭ دە جاۋاپكەرشىلىگى بارىن ايتقان.

مارسەلدە رەسەيلىك جانە اعىلشىن جانكۇيەرلەرى اراسىنداعى توبەلەستەن 30 ادام زارداپ شەككەن. ولاردىڭ ءبىرازى اۋىر جاعدايدا اۋرۋحانادا جاتىر. 20 ادام ۇستالعان. ولاردىڭ ىشىندە اعىلشىندار، فرانسۋزدار جانە اۆستريالىقتار بار.

رەسەيدەن كەلگەن جانكۇيەرلەردىڭ ۇرىس شىعارۋىنا بايلانىستى ەۋروپالىق فۋتبول قاۋىمداستىعى وداعى (ۋ ە ف ا) رەسەي فۋتبول وداعىنا قاتىستى تارتىپتىك ءىس قوزعاپ، جانكۇيەرلەردى ناسىلشىلدىكپەن ايىپتادى. ۋ ە ف ا ەگەر الدا تاعى دا ەكى كوماندا فاناتتارى اراسىندا توبەلەس ورىن الاتىن بولسا، رەسەي مەن انگليا قۇراما كومانداسىن ويىننان شىعاراتىنىن ەسكەرتكەن.