قازاقستاندا وتاندىق تاۋار عانا ساتاتىن العاشقى ساۋدا ورتالىعى اشىلادى

استانا. قازاقپارات - استانا كۇنىنە وراي ەلوردادا تەك وتاندىق تاۋار ساتاتىن قازاقستاننىڭ العاشقى ساۋدا ورتالىعى اشىلادى.

ورتالىق كوممۋنيكاتسيالار قىزمەتىنىڭ بريفينگىسىنە قاتىسقان ق ر ساۋدا كاسىپورىندارى قاۋىمداستىعىنىڭ ۆيتسە- پرەزيدەنتى قايىرلى تاۋكەننىڭ ايتۋىنشا، ساۋدا ورتالىعىنداعى تاۋارلاردىڭ ءبارى «قازاقستاندا جاسالعان» جانە «حالىق ماركاسى» ساپا بەلگىسىنىڭ يەلەرى شىعارعان تاۋارلار.

ساۋدا ورتالىعىنىڭ اۋماعى باستاپقىدا 5000 شارشى مەتردى قۇراماق. ەلىمىزدىڭ 14 وبلىسى مەن الماتى، استانا قالالارىنىڭ تاۋار وندىرۋشىلەرى ساۋدا ورتالىعىندا ءوز بۋتيكتەرىن اشۋعا دايىندالىپ جاتىر. استانادا اشىلاتىن العاشقى قازاقستاندىق ساۋدا ورتالىعىندا باس- اياعى 300 فيرما مەن كومپانيانىڭ تاۋارلارى ساتىلادى.

ق. تاۋكەننىڭ حابارلاۋىنشا، ساۋدا ورتالىعى اشىلعان سوڭ، ءبىر جىل بويى وتاندىق تاۋار وندىرۋشىلەر ءۇشىن ساۋدا ورتالىعىنداعى ورىندارى تەگىن بولادى. ءبىراق، بۇل ءۇشىن تاۋار وندىرۋشىلەر «حالىق ماركاسى» بەلگىسىن يەلەنۋى كەرەك ەكەن. «الدىمەن، تاۋار وندىرۋشىلەر «حالىق ماركاسى» بەلگىسىن يەلەنۋى كەرەك، ول شامامەن 300 مىڭ تەڭگە تۇرادى. ءبىراق، وسى تاۋار وندىرۋشىلەر ساۋدا ورتالىعىنان تەگىن ورىن الىپ، تەگىن جارناما بەرە الادى. ونىڭ ۇستىنە، ولاردىڭ تاۋارىن وزدەرى ەمەس، «حالىق ماركاسى» ساتۋدى موينىنا الادى.

اۆتور: كەنجەكەي توقتامۇرات قىزى