استانادا «نەونوماد» كورمەسى اشىلدى - فوتو
كورمەنىڭ اشىلۋىندا ءسوز العان ۇلتتىق مۋزەي ديرەكتورى دارحان مىڭباي جاستاردىڭ زاماناۋي جۇمىستارىن جوعارى باعالاپ، ولارعا شىعارماشىلىق تابىستار تىلەدى.
- بۇل جۇمىستاردىڭ بارلىعى دا تالانتتى جاس سۋرەتشىلەردىڭ ىشكى دۇنيەلەرىن اشىپ كورسەتەدى. مۇنداي جاڭا باستامالارعا ءارقاشان قولداۋ ءبىلدىرۋىمىز كەرەك. سەبەبى ءبىز ءۇشىن ونەردىڭ ورنى ءبىر بولەك. الداعى ۋاقىتتا دا مۇنداي تىڭ يدەيالاردىڭ اۆتورلارىن ۇلتتىق مۋزەيدەن كورگىمىز كەلەدى. سوندىقتان تالاپتى 7 سۋرەتشىنىڭ شىعارماشىلىق جۇمىستارىنا تابىس تىلەيمىن، - دەدى د. مىڭباي.
«KADMII QYZYL» ارت-توبى 2010-جىلى قۇرىلعان. ونىڭ قاتارىندا بەيبىت اسەمقۇل، ايگەرىم جۇماعاليەۆا، ءاليا قانىبەكوۆا، ناتاليا ليگاي، جەڭىس مولدابەكوۆ، الماس وراقباي، گۇلمارال تاتىبايەۆا ەسىمدى جاستار بار. بارلىعى كورمەگە 30 عا جۋىق جۇمىس قويىلدى. ولاردىڭ اراسىندا ينستاللياتسيا، فوتوسۋرەتتەر، ۆيدەو-ارت جانە پەرفومانس بار.
كورمەنىڭ تۇجىرىمداماسىن ءارتۇرلى جاعدايلارمەن تاستاپ ۇشىپ كەتەتىن تۋعان ءۇيدىڭ سيمۆولى «ۇيا» ينستالياتسياسى بەلگىلەيدى. قازىرگى تاڭدا باقىتتى ءومىر ىزدەگەن ادامدار وزدەرىنىڭ «ورنىققان» ورىندارىن قۇستار سياقتى تاستاپ كەتەدى. الەمدە ۇنەمى قوزعالىس، ادامدار قالادان-قالاعا، ءبىر ەلدەن ەكىنشى ەلگە، ءبىر قۇرلىقتان ەكىنشى قۇرلىققا كوشىپ جاتادى. ءومىردىڭ زاماناۋي كوشۋ بەينەسى بۇكىل الەمگە ورتاق، بۇگىنگى كوشپەلىلەر - نەونومادتار - ءوزىن جانە ءوز باقىتىن تابۋ ءۇشىن ورىن اۋىستىرىپ جاتادى. وسى ارادا، ءوز تامىرىڭنان قول ۇزە وتىرىپ، ءوزىڭنىڭ كىم جانە قايدان ەكەنىڭدى ۇمىتپاۋ وتە ماڭىزدى!
سونىمەن قاتار، كورمەگە ناتاليا ليگايدىڭ «ءومىر ەلەسى»، ءاليا قانىبەكوۆانىڭ «تۋعان جەرىم تۇعىرىم»، گۇلمارال تاتىبايەۆانىڭ «زامانا كوشى»، الماس وراقبايدىڭ «جۇرت» فوتوسۋرەتتەرىنىڭ توپتاماسى قويىلادى. وسى جۇمىستاردا سۋرەتشىلەر قونىس اۋدارۋدىڭ الەۋمەتتىك-مادەني ۇردىسىنە ءوز كوزقاراستارى مەن ويلارىن بىلدىرۋگە تىرىسادى.
قالا ءوز توڭىرەگىندەگى ەلدى مەكەندەر مەن ولاردىڭ تۇرعىندارىن وزىنە سىڭىرە وتىرىپ قارقىندى وسۋدە. مەگاپوليستەردەگى ادامدار قۇم قيىرشىعى سياقتى. الايدا ءاربىر ادام بىرەگەي جانە تالانتتى، ايگەرىم جۇماعاليەۆانىڭ «قالا الپاۋىتتارى» توپتاماسىمەن جاسالعان فوتوتۋىندىلارى وسى تۋرالى اڭگىمەلەيدى. سۋرەتشى ساۋلەتتىك انسامبلدەردى ەمەس، ءمۇسىن كومپوزيتسيالارىن ەمەس، قالانى جاسايتىن جانە وعان جان كىرگىزەتىن ادامداردى جىرلايدى.
جەڭىس مولدابەكوۆتىڭ «تاريح قويناۋىنان جارقىن بولاشاققا» توپتاماسىمەن جاسالعان فوتوتۋىندىلارى بابالارىمىزدىڭ كوشىپ-قونعان جولدارىمەن بۇگىنگى تەمىر جولدار ءوتىپ جاتۋى ىقتيمال قازاقستاننىڭ كەڭ بايتاق دالاسىنا ەرەكشە ورىن بەرەدى. سۋرەتشى ءوز سيۋجەتتەرىندە قازىرگى مەن كەشەگىنى ۇشتاستىرادى.
بەيبىت اسەمقۇلدىڭ «شەكسىزدىك» توپتاماسىمەن جاسالعان فوتوتۋىندىلارى ايەلدەرگە ارنالعان. قازاق مادەنيەتىندەگى ايەل - وتباسى مەن ءداستۇردىڭ ساقتاۋشىسى. سۋرەتشى قازىرگى زامانداعى ايەلدىڭ كلاسسيكالىق بەينەسىنىڭ وزگەرۋى تۋرالى وي تولعايدى.
كورمە 26- ماۋسىمعا دەيىن جۇمىس ىستەيدى.
