الماتىدا دج. ۆەرديدىڭ «تراۆياتا» وپەراسىنىڭ جاڭا قويىلىمى تانىستىرىلدى - فوتو

الماتى. قازاقپارات - بۇگىن الماتىدا اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا يتالياندىق كومپوزيتور دجۋزەپپە ۆەرديدىڭ «تراۆياتا» وپەراسىنىڭ جاڭا قويىلىمىنىڭ تانىستىرىلىمى بولىپ ءوتتى.

وسى شاراعا ارنالعان باسپا ءسوز ءماسليحاتىنا تەاتر ديرەكتورى اسقار بورىبايەۆ، قويۋشى- رەجيسسەر ءلايلىم يمانعازينا، قويۋشى- سۋرەتشى ۆياچەسلاۆ وكۋنەۆ، باس ديريجەر نۇرلان جاراسوۆ جانە تەاتر سوليستەرى قاتىستى.

«ۆەرديدىڭ «تراۆياتا» وپەراسى بىزدە تالاي جىلدان بەرى قويىلىپ كەلە جاتىر. ءبىز الدىمىزعا الەمگە بەلگىلى كلاسسيكالىق سپەكتاكلدەردى جاڭعىرتۋ مىندەتىن قويدىق. سودان، ساحنانى بەزەندىرۋ، كيىمدەردى جاڭارتۋ جۇمىستارى قولعا الىندى. سپەكتاكل جاڭا تۇرعىدان وقىلادى. ال مۋزىكا جاعىنا كەلەر بولساق، كەي جەرلەرىندە اۆتورلىق ءماتىن مەن حورمەن ايتىلاتىن جەرلەرى قالپىنا كەلتىرىلدى»، - دەدى ا. بورىبايەۆ.

ودان باسقا، شىعارماشىلىق ۇجىم تەاتر الەمىندە بولىپ جاتقان الەمدىك قۇبىلىستارعا توقتالدى.

«قازىر كومپيۋتەر تىلىمەن ايتقاندا بۇكىل الەمدە وپەرا ونەرى «قايتا جۇكتەلىپ جاتىر» دەۋگە بولادى. مەن يتاليادا بولعان كەزىمدە جەرگىلىكتى تەاتر وكىلدەرى «زالعا كىرگەندە تەك شاشتارىن اق شالعان ادامداردىڭ عانا وتىراتىنىن» كورەتىندەرىن ايتىپ، وكىنىش ءبىلدىردى. دەمەك، باتىستى دا وسكەلەڭ ۇرپاق وپەراعا ونشا قىزىقپايدى دەگەن ءسوز. سوندىقتان، الەمنىڭ كلاسسيكالىق تەاترلارىندا قازىر رەجيسسۋرا كلاسسيكالىق جانە ەكسپەريمەنتالدىق بولىپ ەكىگە بولىنگەن. ولار زالعا كورەرمەندەردى تۇكپىلىكتى جاڭا، تىڭ يدەيالارمەن شاقىرعىسى كەلەدى. سونىڭ ارقاسىندا زالدا كورەرمەندەر اراسىندا جاستار دا كوبەيىپ جاتىر دەۋگە بولادى. ءبىراق ءبىز «تراۆياتا» وپەراسىندا ەكسپەريمەنت جاساۋعا بارعان جوقپىز. جاڭا قويىلىم دەگەن بۇل ءار كەز تۇبەگەيلى وزگەرىستەرمەن كورەرمەنننىڭ جاعاسىن ۇستاتۋ دەگەن ءسوز ەمەس قوي. مەن تەك ءوز الدىما بۇل تاريحتى قاراپايىم تىلمەن شىنايى تۇردە تۇسىندىرگىم كەلدى»، - دەدى ل. يمانعازينا.

وپەرانىڭ جاڭا قويىلىمىن دايىنداۋعا كوپ ادام جۇمىلدىرىلعان.

«كەز كەلگەن قويىلىم - بۇل ۇلكەن ۇجىمدىق جۇمىس. ءبىز ءتيىستى قارجى بولگەنى ءۇشىن ق ر مادەنيەت جانە سپورت مينيسترلىگىنە العىسىمىزدى بىلدىرەمىز. كەز كەلگەن قويىلىمدا گريمەرلەر، كيىم، اياق كيىم تىگەتىن تسەحتار جانە باسقا دا تسەحتار جۇمىس اتقارادى. مىسالى، بىزدە بيىل جاڭا 50 فراك تىگىلدى. ال ءبىزدىڭ ۇجىمدا 60 ادام جۇمىس ىستەيدى. وسى جاڭا قويىلىمعا كەرەكتى العاشقى نوبايلاردى ءبىز وسى جىلدىڭ قاڭتار ايىندا العانبىز. دايىندىق جۇمىستارى سول ايدان بەرى جۇرگىزىلىپ كەلە جاتىر»، - دەپ ءسوزىن قورىتىندىلادى تەاتر ديرەكتورى.

 

 اۆتور: ايبوتا جاپپاربەرگەن