بۇل كۇنى ديداحمەت ءاشىمحان ۇلى دۇنيەگە كەلگەن
شىعىس قازاقستان وبلىسى كاتونقاراعاي اۋدانى جاڭاۇلگى اۋىلىندا دۇنيەگە كەلگەن. 1968 -جىلى شىڭعىستاي مەكتەبىن بىتىرگەننەن كەيىن جول قۇرلىسى ۋچاسكەسىندە جۇمىسشى، بولشەنارىم اۋداندىق مادەنيەت بولىمىندە اۆتوكلۋب مەڭگەرۋشىسى، سوۆەت ارمياسى قاتارىندا (1969 - 1971) سارباز، الماتى ءۇي قۇرلىسى كومبيناتىندا تاس قالاۋشى بولعان.
قازمۋ- ءدىڭ جۋرناليستيكا فاكۋلتەتىنىڭ (1972 - 1978) كۇندىزگى بولىمىندە وقي ءجۇرىپ، ەڭبەك جولىن شىعىس قازاقستان وبلىستىق «كوممۋنيزم تۋى» (1975 - 1976)، «لەنينشىل جاس» (1978) گازەتتەرىندە ءتىلشى بولىپ باستاعان ول كەيىن رەسپۋبليكالىق «قازاقستان پيونەرى» (1978 - 1980) «قازاق ادەبيەتى» (1980 - 1992) گازەتتەرىندە ءبولىم مەڭگەرۋشىسى، «زامان - قازاقستان» (1992-1993) گازەتىندە باس رەداكتوردىڭ ورىنباسارى قىزمەتىن اتقاردى. 1993 -جىلدان 2015 -جىلعا دەيىن حالىقارالىق «تۇركىستان» گازەتىندە باس رەداكتوردىڭ ءبىرىنشى ورىنباسارى. سونداي - اق، 2003-2015 -جىلدارى «ەل - شەجىرە» قوعامدىق قورىنىڭ پرەزيدەنتى، «الاش» باسپاسىنىڭ ديرەكتورى بولىپ قىزمەت ەتتى.
ديداحمەت ءاشىمحان ۇلى 1999 -جىلدىڭ اقپان - ماۋسىم ارالىعىندا ارنايى شاقىرۋمەن استانا قالالىق «استانا اقشامى» گازەتىندە باس رەداكتوردىڭ 1- ورىنباسارى، 1993 - جىلدان ءومىرىنىڭ سوڭىنا دەيىن نەگىزگى قىزمەتىمەن قوسا ءار كەزەڭدە «اتامۇرا» باسپاسىندا رەداكتور، ۇلتتىق قاۋىپسىزدىك كوميتەتىنىڭ «وتان» جۋرنالىندا باس رەداكتوردىڭ ورىنباسارى، قازاق مەملەكەتتىك ۋنيۆەرسيتەتى جۋرناليستيكا فاكۋلتەتىنىڭ اعا وقىتۋشىسى بولدى.
ادەبي شىعارماسى تۇڭعىش رەت باسپا ءسوز بەتىندە 1965 -جىلى 8 - ناۋرىزدا بولشەنارىم اۋداندىق «ەڭبەك تۋى» گازەتىندە جاريالانعان («شىرقال، ءان» ولەڭ) .
پروزا جانرىندا تۇڭعىش اڭگىمەسى «اققابانىڭ تولقىنى» دەگەن اتپەن 1975 -جىلى «كوممۋنيزم تۋى» گازەتىندە، «ارمان قاناتىندا» اتتى كوللەكتيۆتىك جيناقتا (1978) جارىق كورگەن. 1981 -جىلى «اققابانىڭ تولقىنى»، 1987 -جىلى «ون ءبىرىنشى كۇز»، 1990 -جىلى «كامەننايا پاد»، 1997 -جىلى «جەر اڭساعان سارىاتان»، 2000 -جىلى « سامىرسىن سازى»، 2004 -جىلى «اڭگىمە ەمەس اڭگىمەلەر» اتتى پروزالىق كىتاپتارى «جالىن»، «جازۋشى»، «ەلوردا» باسپالارىنان وقىرمانعا جولداما العان.
ديداحمەت ءاشىمحان ۇلى - ادەبي كوركەم شىعارمالارىمەن قوسا جەتى جۇزگە جۋىق پۋبليتسيستيكالىق تۋىندانىڭ اۆتورى.
1986 -جىلدان س س س ر جازۋشىلار، جۋرناليستەر وداقتارىنىڭ مۇشەسى. «جالىن» جابىق بايگەسىنىڭ ەكى مارتە جۇلدەگەرى. جاس جازۋشىلاردىڭ بۇكىل وداقتىق VIII كەڭەسىنە قاتىسۋشى. جەكەلەگەن بىرنەشە شىعارماسى نەمىس، قىتاي، موڭعول، ۋكراين مارى، تاتار، قىرعىز تىلدەرىنە اۋدارىلعان. 2005 -جىلى حالىقارالىق «الاش» سىيلىعىنا يە بولدى. سونىمەن قاتار، جازۋشىنىڭ ءوزى ا. كۋرچاتكين، ا. اشيروۆ، ح. ابدۋللين، ت. مينۋللين، ا. لۋپان، ت. پۋلاتوۆ، پ. پۋرەۆسۋرەن، كريشننابام مالل، ت. ب. كوپتەگەن شەتەل جانە تۋىسقان حالىقتار جازۋشىلارىنىڭ جەكە پوۆەستەرى مەن اڭگىمەلەرىن، ە. شۆارتستىڭ «اجداحا» پەساسىن، ال سوڭعى جىلدارى اعىلشىن جازۋشىسى دج. گولسۋورسيدىڭ نوۆەللالار جيناعىن، دج. لونداننىڭ رومان پوۆەستەرىن قازاق تىلىندە سويلەتتى.
مولداۆان دراماتۋرگى ا. كيرييدىڭ «زونا» پەساسى ديداحمەت ءاشىمحان ۇلىنىڭ تارجىمالاۋىمەن 1998 -جىلدان بەرى ع. مۇسرەپوۆ اتىنداعى جاسوسپىرىمدەر تەاترىندا قويىلىپ كەلەدى.
ديداحمەت ءاشىمحان ۇلى - قالىڭ وقىرمان مەن ادەبي ورتادا اڭگىمە جانرىنىڭ شەبەرى، ستيليست، تالانتتى جۋرناليست رەتىندە تانىلعان قالامگەر بولدى.
جازۋشى ديداحمەت ءاشىمحان ۇلى 2015 -جىلدىڭ 23 - مامىرىندا دۇنيەدەن وزدى.
