استانا ءوزىنىڭ ساۋلەت ونەرىمەن الەمنىڭ اسا ءىرى قالالارىمەن جارىساتىن بولادى - مىسىر پرەزيدەنتى ابدەل فاتتاح اس- سيسي
پرەزيدەنت ابدەل فاتتاح اس- سيسي ءبىزدىڭ تىلشىمىزگە بەرگەن ەكسكليۋزيۆتى سۇحباتىندا ەكىجاقتى قارىم- قاتىناستىڭ پەرسپەكتيۆالارى، استانانى اۋىستىرۋ تاجىريبەسى، حالىقارالىق تەرروريزمگە قارسى كۇرەس، مىسىر وركەنيەتىنىڭ مۇراسى، پەرعاۋىندار ەلىنىڭ باي تاريحىنداعى قازاق دالاسىنان شىققان تۇلعالاردىڭ ءرولى، مىسىرداعى دەمالىس ورىندارىنىڭ جازعى ماۋسىمعا دايىندىعى، اسكەري جانە ساياسي ءتارتىپ جانە باسقا دا ماسەلەلەر جونىندە اڭگىمەلەپ بەردى.
- پرەزيدەنت مىرزا، ءسىزدىڭ قازاقستانعا جاساعان ساپارىڭىزدىڭ باستى قورىتىندىلارى قانداي؟
- بىرىنشىدەن، مەنىڭ اعىمداعى جىلدىڭ اقپان ايىندا استاناعا جاساعان ءبىرىنشى رەسمي ساپارىمدى ۇيىمداستىرعاندارى ءۇشىن قازاقستان تاراپىنا شىنايى ريزاشىلىعىمدى بىلدىرگىم كەلەدى. وسى ساپار بارىسىندا ەكى ەل اراسىنداعى قارىم- قاتىناستاردىڭ جوعارى دەڭگەيىن بايقادىم، سونداي- اق، مىسىر حالقىنىڭ اتىنان قازاقستاندى تاۋەلسىزدىگىنىڭ 25 جىلدىعىمەن قۇتتىقتادىم جانە پرەزيدەنت نۇرسۇلتان نازاربايەۆتى ەكى مەملەكەت اراسىنداعى ديپلوماتيالىق قاتىناستاردىڭ ورناۋىنىڭ 25 جىلدىعىنا وراي مىسىرعا ساپارمەن كەلۋگە شاقىردىم. بۇل رەتتە، مىسىردىڭ مارتەبەلى قوناقتى رەسمي جانە حالقىمىزدىڭ تاراپىنان لايىقتى دەڭگەيدە قابىلداۋعا دايىن ەكەندىگىن اتاپ ءوتتىم.
مەنىڭ دوستاس قازاقستانعا جاساعان ساپارىم ەكى ەل اراسىنداعى ىنتىماقتاستىقتى نىعايتۋ جولدارىن تالقىلاۋ ءۇشىن، سونداي- اق، بىرلەسكەن ىنتىماقتاستىقتىڭ جاڭا پەرسپەكتيۆالارىن ىزدەۋ ءۇشىن جاقسى مۇمكىندىك ۇسىندى. تاراپتار كوپتەگەن سالالارداعى، سونىڭ ىشىندە ءدارى- دارمەك ءوندىرىسى جانە استىق ساقتاۋداعى ىنتىماقتاستىقتى ودان ءارى كەڭەيتۋدى تالقىلاۋ ماقساتىندا اعىمداعى جىلدىڭ قىركۇيەك ايىندا كايردە وتەتىن مىسىر- قازاقستان ۇكىمەتارالىق كوميسسياسىنىڭ بىرلەسكەن بەسىنشى وتىرىسىنا ءتيىستى دايىندىقتى وتكىزۋگە كەلىستى. بۇدان بولەك، «الماتى - شارم اش- شەيح - الماتى» باعىتى بويىنشا تىكەلەي اۆياقاتىناستى جاڭعىرتۋ تۋرالى ۋاعدالاستىققا قول جەتىكىزىلدى. بۇل رەيستەر بۇگىنگى كۇنى جاڭعىرتىلعان جانە قازىرگى ۋاقىتتا «استانا - شارم اش- شەيح - استانا» تىكەلەي اۆياقاتىناسىن اشۋ بويىنشا جۇمىستار جۇرگىزىلۋدە.
كەلىسسوزدەر بارىسىندا قازاقستان تاراپىنان تەرروريزمگە قارسى كۇرەس تاقىرىبىنا، اسىرەسە، ونىڭ يدەولوگيالىق جانە ءدىني اسپەكتىلەرىنە ۇلكەن نازار اۋدارىلدى. وسىنى نەگىزگە الا وتىرىپ، مىسىر ۇستىمىزدەگى جىلى ءتيىستى باسقوسۋلارعا بەلسەندى تۇردە قاتىسۋدى جوسپارلاپ وتىر. بۇل ورايدا، پرەزيدەنت نۇرسۇلتان نازاربايەۆتىڭ يسلامنىڭ بەيبىت جانە جاسامپاز ءدىن رەتىندە شىنايى ءمانىن تۇسىندىرۋگە باعىتتالعان بۇۇ قامقورلىعىنداعى تەرروريزمگە قارسى كواليتسيا قۇرۋ جونىندەگى جانە ب ۇ ۇ شتاب- پاتەرىندەگى «دىندەر بەيبىتشىلىك ءۇشىن» فورۋمىن ۇيىمداستىرۋ بويىنشا باستامالارىنا مىسىر ناقتى قولداۋ كورسەتكەنىن اتاپ وتكىم كەلەدى.
- ءبىزدىڭ ەلدەر اراسىنداعى تاۋار اينالىمى 50 ميلليون ا ق ش دوللارى كورسەتكىشىنەن ءسال عانا اسادى. بۇل جايت ساۋدا- ەكونوميكالىق ىنتىماقتاستىق الەۋەتىمىزگە سايكەس كەلمەيدى. ونى ءوسىرۋ ءۇشىن نە ىستەۋ كەرەك؟ جاڭا سۋەتس ارناسى مەن نارىقتى، سونداي- اق، ەۋرازيالىق ەكونوميكالىق وداق (ە ا ە و) مۇمكىندىكتەرىن پايدالانۋ بويىنشا جوسپارلاردى قالاي بىرىكتىرۋگە بولادى؟ قازاقستان استىعى مىسىر نارىعىنا جەتە مە؟
- ءبىزدىڭ ەلدەر وسى باعىتتا ماڭىزدى قادامدار جاساپ ۇلگەردى. قازاقستان باسشىلىعىنا تاعى دا ءبىر العىس ايتىپ، قازاقستاننىڭ مىسىر مەن ە ا ە و اراسىنداعى ەركىن ساۋدا كەلىسىمىنە قول قويۋدى قولداعاندىعى ءۇشىن ريزاشىلىعىمدى بىلدىرەمىن. ءبىز تاياۋ ۋاقىتتا ەكونوميكالىق ىنتىماقتاستىقتى نىعايتا الاتىنىمىزعا سەنەمىز. بۇدان بولەك، ءبىز ەكى ەلدىڭ ساۋدا جانە ترانزيت سالاسىنداعى ىنتىماقتاستىق كەلەشەگىن، سونداي- اق، مىسىر مەن قازاقستان كاسىپكەرلەرى اراسىنداعى بايلانىستاردى نىعايتۋعا جانە ەلدەرىمىز اراسىندا ينۆەستيتسيا الماسۋ مەن ساۋدا جاساۋ مۇمكىندىكتەرىن انىقتاۋعا باعىتتالعان بىرلەسكەن ىسكەرلىك كەڭەس قىزمەتىن بەلسەندى ەتۋدى تالقىلاۋعا دايىنبىز.
ەكى ەل اراسىندا تەك ءوزارا ساۋدانى عانا ەمەس، سونىمەن قاتار، بىرلەسكەن ينۆەستيتسيالاردى دامىتۋدا دا كەلەشەك بار ەكەندىگىن اتاپ وتكىم كەلەدى. سۋەتس ارناسى ايماعىن دامىتۋ جوباسىنا، اتاپ ايتقاندا، ەنەرگەتيكا، فارماتسيەۆتيكا، استىق داقىلدارىن ساقتاۋ جانە ساتۋ، تۋريزم، ينفراقۇرىلىم، توقىما ونىمدەرى، جيھاز جانە قۇرىلىس ماتەريالدارى سالالارىنا ينۆەستيتسيا تارتۋ ەرەكشە قىزىعۋشىلىق تۋعىزۋى مۇمكىن. وسىنىڭ بارلىعىنا مىسىردىڭ گەوگرافيالىق ورنالاسۋىنىڭ ارقاسىندا قول جەتكىزىلۋى ىقتيمال. ءبىزدىڭ دە ەلىمىز ەركىن ساۋدا تۋرالى كوپتەگەن كەلىسىمدەرگە قول قويعان، سونداي-اق، افريكا، ەۋروپا جانە پارسى شىعاناعى ەلدەرىمەن قارىم- قاتىناستاردا جوعارى مارتەبەگە يە. وسى فاكتورلار مىسىردى قازاقستاندىق بيدايدى افريكا مەن تاياۋ شىعىس ەلدەرىنە وتكىزۋدىڭ ورتالىعىنا اينالدىرۋى مۇمكىن.
مىسىردىڭ تاياۋ ارادا يسلام ىنتىماقتاستىعى ۇيىمىنىڭ (ي ى ۇ) ازىق- تۇلىك قاۋىپسىزدىگى جونىندەگى يسلام ۇيىمىنا قوسىلۋى تۇسىندا اتالعان سالادا ارەكەتتەستىكتى ىلگەرىلەتۋ جونىندەگى قازاقستاننىڭ ۇسىنىسىن مىسىردىڭ قۇپتايتىندىعىن اتاپ وتكەن ءجون. اتالعان مانماتىندە، مىسىر ۇستىمىزدەگى جىلى استانادا وتەتىن ازىق- تۇلىك قاۋىپسىزدىگى جانە اۋىل شارۋاشىلىعىن دامىتۋ جونىندەگى يىۇ مينيسترلەرىنىڭ 7- كونفەرەنتسياسىنا قاتىسۋدى جوسپارلاپ وتىر.
- ءسىز مىسىر استاناسىن اۋىستىرۋ جانە جاڭا اكىمشىلىك ورتالىق قۇرۋ تۋرالى جوسپارلاردى جاريا ەتكەنسىز. قازاقستان تاجىريبەسى ءسىزدىڭ تاراپىڭىزدان قىزىعۋشىلىق تۋدىرىپ وتىرعانى عوي بۇل سوندا؟ جانە ءسىز وسى جەردە استانادا بولعان كەزىڭىزدە العان اسەرىڭىز تۋرالى ايتا كەتسەڭىز.
- ارينە، بىزگە قازاقستان تاجىريبەسى قىزىقتى. ول مۇقيات زەرتتەۋگە تۇرارلىق جانە ءبىز جاڭا اكىمشىلىك ورتالىق سالۋ بارىسىندا قازاقستان تاجىريبەسىن پايدالانۋعا مۇددەلىمىز. جالپى ءوز باسىم استانادا كورگەن ساۋاتتى جوسپارلاۋدى جوعارى باعالايمىن. مەن ءۇشىن، سونداي- اق، قالانىڭ كوركەم زاماناۋي ساۋلەتى، كوشەلەر جۇيەسى مەن دامىعان ينفراقۇرىلىمى ەرەكشە قىزىعۋشىلىق تۋدىردى.
قازاقستانعا جاساعان ساپارىمنان كەيىن، مىسىردا جاڭا اكىمشىلىك استانا قۇرىلىسىن سالۋ بارىسىندا قولدانۋعا مۇمكىن بولاتىن وسى تاجىريبەمەن ەگجەي- تەگجەيلى تانىسۋ ءۇشىن، مىسىرلىق دەلەگاتسياعا استاناعا جوعارى دەڭگەيدە ساپار جاساۋدى تاپسىردىم. وسى ورايدا، مەن قازاقستان باسشىلىعىنا جانە بۇكىل قازاقستان حالقىنا استانانى سالۋداعى وراسان جەتىستىكتەرى ءۇشىن لايىقتى باعا بەرگىم كەلەدى. مەن بۇگىندە استانا ءوزىنىڭ ساۋلەت ونەرىمەن الەمنىڭ اسا ءىرى قالالارىمەن جارىساتىنىنا سەنىمدىمىن.
- كەلەسى جىلى استانا ەكسپو حالىقارالىق كورمەسىن وتكىزەدى. وسى كورمەگە كەلۋشىلەردىڭ مىسىردىڭ قاتىسۋىنان نە كۇتۋلەرىنە بولادى؟
- بىرىنشىدەن، مەن قازاقستان باسشىلىعىن جانە بۇكىل قازاقستان حالقىن وسى ماڭىزدى حالىقارالىق ءىس- شارانى ۇيىمداستىرۋلارىمەن قۇتتىقتاعىم كەلەدى. مىسىر «بولاشاق ەنەرگياسى» تاقىرىبىندا استانادا وتەتىن ەكسپو-2017 كورمەسىنە بەلسەندى قاتىسۋعا مۇددەلى، سونداي- اق، كۇن، جەل جانە گيدروەنەرگيا ءتارىزدى جاڭعىرتىلاتىن ەنەرگيا كوزدەرىن قولدانۋ سالاسىنداعى ەڭ وزىق تەحنولوگيالاردى ۇسىنۋدى كوزدەپ وتىر.
ەكسپو-2017 كورمەسى مىسىردىڭ تازا ەنەرگيا سالاسىنداعى جەتىستىكتەرىن كورسەتۋ ءۇشىن تاماشا الاڭ بولىپ تابىلادى. بۇگىندە مىسىردا ەنەرگيانىڭ %30 ى جەل ەنەرگياسىنان وندىرىلەدى جانە ونى 2020 -جىلعا قاراي %70 عا جەتكىزۋ كوزدەلىپ وتىر. قازىرگى ۋاقىتتا كۇن ساۋلەسى ارقىلى قۋات وندىرەتىن جىلۋ- ەلەكتر ستانسالارىنىڭ جەرگىلىكتى ۇلەسى %50 دى قۇرايدى، وعان مۇنارالار، اينالار جانە قابىلداعىشتار، سونداي- اق، كابەلدەر، جابدىقتار، مەحانيكالىق جانە ەلەكتر جۇمىستارى كىرەدى.
كورمە پاريجدە وتكەن كليماتتى وزگەرتۋ جونىندەگى كونفەرەنسيادا قول جەتكىزىلگەن دامۋشى ەلدەردىڭ ءوز مىندەتتەمەلەرىن ورىنداۋلارى تۇسىندا تازا ەنەرگيا سالاسىندا دامىعان جانە دامۋشى ەلدەر اراسىنداعى ءىس- قيمىلداردى ۇيلەستىرۋ مەن ولاردىڭ ىنتىماقتاستىعى ءۇشىن جاقسى مۇمكىندىك بەرەدى دەپ سانايمىن.
- ءسىزدى قازىرگى تاڭدا حالىقارالىق سيپاتقا يە بولىپ وتىرعان تەرروريزمگە قارسى كۇرەسكەر رەتىندە بىلەمىز. وسى ىندەتپەن كۇرەسۋدىڭ جولدارى قانداي؟
- تەرروريزمنىڭ ءدىنى دە، وتانى دا جوق. ارينە، بۇل اسا قاۋىپتى حالىقارالىق پروبلەما بولىپ تابىلادى. ونىڭ گەوگرافيالىق شەكاراسى جوق - ەۋروپا، افريكا، تاياۋ شىعىس جانە، تۇتاستاي العاندا، بۇكىل الەم تەررورلىق ءىس- ارەكەتتەردەن جاپا شەگىپ وتىر. سوندىقتان، تەررورمەن كۇرەسۋ ءۇشىن بارشاعا ورتاق حالىقارالىق باعدارلاما قابىلداۋ ماڭىزدى. ول تەك اسكەري قارسى قيمىلدارمەن شەكتەلمەۋى كەرەك. زياتكەرلىك جانە ءدىني ورتالاردى بەلسەندى قاتىستىرۋ قاجەت. الەۋمەتتىك- ەكونوميكالىق جاعدايدىڭ ناشار بولۋى تەرروريزمنىڭ تارالۋىنا جانە تەررورشىلاردىڭ ءوز قاتارلارىن جاڭا جاقتاۋشىلارمەن تولىقتىرۋىنا جاعداي جاسايتىندىعىن ەسكەرە وتىرىپ، ەكونوميكالىق جانە الەۋمەتتىك جاعدايدا جاقسارتۋعا كۇش سالعان ابزال. سونىمەن قاتار، تەررورشىل ۇيىمداردىڭ كەيبىرەۋلەرىن ونشا ءقاۋىپتى ەمەس دەپ ەسەپتەپ جانە ولاردىڭ تەك بەلگىلى ءبىر توبىنا عانا جۇمىلىپ، بۇل جۇمىستى ىرىكتەپ جۇرگىزبەي، تەررورشىل ۇيىمداردىڭ بارلىعىمەن كۇرەسۋ قاجەت.
تەرروريزمگە قارسى كۇرەس ماسەلەسىندە مەن، تەررورعا قارسى كۇرەسكە شاقىراتىن الەمدىك جانە ءداستۇرلى دىندەر ليدەرلەرى سەزىن ۇيىمداستىرۋ بويىنشا قازاقستان ۇلەسىن قوسا العاندا، پرەزيدەنت ن. نازاربايەۆتىڭ حالىقارالىق فورۋمداردا كوتەرىپ جۇرگەن باستامالارىن جوعارى باعالايمىن.
- مىسىردىڭ وركەنيەتى - الەمدەگى ەڭ كونەلەرىنىڭ ءبىرى. پەرعاۋىنداردىڭ كونە پيراميدالارى وزدەرىنىڭ وراسان ۇلكەندىگىمەن تاڭعالدىرادى. بۇگىنگى كۇنى پەرعاۋىندار قۇپيالارىنىڭ بارلىعى اشىلدى دەپ ايتۋعا بولا ما؟
- مىسىر وركەنيەتى شىنىمەن دە الەمدەگى ەڭ كونەلەرىنىڭ ءبىرى، ءتىپتى، ەڭ كونەسى دەسە دە بولادى. ادامزات تاريحىندا ول عىلىم مەن پروگرەستىڭ، ادەبيەت پەن ونەردىڭ، مەديتسينا مەن استرونوميانىڭ، اۋىل شارۋاشىلىعىنىڭ جانە كوپتەگەن باسقا دا ءومىر سالالارىنىڭ بايىپ وركەندەۋىنە وراسان زور ۇلەس قوستى. كونە مىسىرلىق وركەنيەت وسى كۇنگە دەيىن ادامزاتتى ءوزىنىڭ ماڭگىلىك مۇراسىمەن بايىتا وتىرىپ، ۋاقىت وتكەن سايىن ءوز قۇپيالارىن دا اشا تۇسۋدە.
ارحەولوگيالىق ميسسيالار وسى كۇنگە دەيىن الەمنىڭ ءىرى مۇراجايلارىنا كورىك بەرەتىن كونە زامان ەسكەرتكىشتەرىن تابۋدا. مەن ۇلى مىسىرلىق وركەنيەت قۇپيالارىنىڭ بارلىعى بۇگىنگى كۇنى تولىعىمەن اشىلدى دەپ ويلامايمىن. سەبەبى، ول ادامزات تىرشىلىگىنىڭ ءتۇرلى سالاسىندا بەلگىلى ءبىر پروگرەسكە قول جەتكىزگەن كونە مىسىرلىقتاردىڭ ءومىرى تۋرالى قۇپيالارىمەن ءبىزدى وسى كۇنگە دەيىن تاڭعالدىرىپ كەلەدى.
- ءسىزدى تاريحپەن اۋەستەنەدى دەپ ەستىدىك. ءبىزدىڭ ەلدەر اراسىنداعى ەكىجاقتى قاتىناستا قازاقتىڭ ۇلى دالاسىندا دۇنيەگە كەلگەن مىسىر مەن شام ەلىنىڭ XIII عاسىرداعى ايگىلى ءامىرشىسى سۇلتان از- زاحير بەيبارىستىڭ تاريحي مۇراسى تاقىرىبى ەرەكشە ورىن الادى. مىسىردا وسى تاريحي فاكتىگە قانشالىقتى ءمان بەرىلەدى؟
- بۇل تاريحي فاكت ەكىجاقتى قاتىناستىڭ نىعايۋىنا ىقپال ەتەدى جانە ءبىزدىڭ تاريحي بايلانىسىمىزدى بەينەلى تۇردە ايعاقتاي الادى. جالپى، از- زاحير بەيبارىستىڭ فرانتسيا كورولى ليۋدوۆيك IX تۇتقىنعا تۇسكەن مانسۇر تۇسىنداعى شايقاستاعى تاريحي ماڭىزدىلىعى مەن ءرولىن ايرىقشا اتاپ وتكىم كەلەدى. بەيبارىستىڭ اسكەري جوسپارلاۋى مانسۇر تۇسىنداعى شايقاستا كرەسشىلەردى جەڭۋگە قول جەتكىزۋدە وراسان زور ءرول اتقاردى. بۇل تۇرعىدا، مەن، ەلىمىزدىڭ تاريحىنىڭ ماڭىزدى كەزەڭىن كۋالاندىراتىن ماڭىزدى يسلام ەسكەرتكىشتەرىنىڭ ءبىرى بولىپ تابىلاتىن مىسىرداعى از- زاحير بەيبارىس مەشىتىن قالپىنا كەلتىرۋگە باعىتتالعان قازاقستان تاراپىنىڭ كۇش- جىگەرىن جوعارى باعالايمىن.
- مىسىردىڭ الەمگە ايگىلى تاريحىنا قازاق دالاسىنان شىققان وزگە دە ماملۇكتەر ءوز ۇلەستەرىن قوستى. وكىنىشكە قاراي، قازاقستاندا وسى تاريحي تۇلعالار اسا تانىمال ەمەس. سوندىقتان ولاردىڭ ءومىرى تۋرالى ءوزىڭىز بىلەتىن قىزىقتى فاكتىلەرمەن بولىسسەڭىز.
- ماملۇك مەملەكەتى مىسىردا 1250 -جىلى قۇرىلدى جانە 1517 -جىلعا دەيىن ءومىر ءسۇردى. وسى ءۇش عاسىر ىشىندە مىسىرعا كوپتەگەن سۇلتان- ماملۇكتەر امىرلىك ەتتى. از- زاحير بەيبارىسپەن قوسا، ايگىلى امىرشىلەردىڭ ءبىرى سۇلتان سايفۋددين كۋتۋز بولدى. ول 1260 -جىلى اين- دجالۋت تۇسىنداعى شايقاستا موڭعولداردى جەڭىلىسكە ۇشىراتقان. ءال- مانسۇر كالاۋن، كانزۋل- ءال- گوري سۇلتاندارىن اتاپ ءوتۋ كەرەك. كرەسشىلەردى وڭىردەن ءبىرجولا قۋىپ شىققان ءال- مالىك ءال- اشراف سالاح اد- دين حاليل يبن كالاۋن سۇلتان تۋرالى اڭگىمەنىڭ ءجونى مۇلدەم بولەك.
- مىسىر، ماسەلەن، شارم- اش- شەيحتە نەمەسە حۋرگادادا دەمالۋعا نيەتتى قازاقستاندىق تۋريستەر ءۇشىن ۆيزالىق رەجىمدى جەڭىلدەتۋدى جوسپارلاي ما؟
- مىسىر ەكى ەل حالقى اراسىنداعى تاريحي جانە مادەني بايلانىستاردى ەسكەرە وتىرىپ، قازاقستاندىق تۋريستەرگە ءاردايىم جىلى قاباق تانىتىپ كەلەدى. قازىرگى ۋاقىتتا مىسىر تۋريستەر ءۇشىن قولايلىلىق پەن قاۋىپسىزدىكتى قامتاماسىز ەتۋ ءۇشىن قاجەتتى بارلىق قولىنان كەلگەن شارالاردى قابىلداپ جاتقانىن اتاپ وتسەم دەيمىن.
قازاقستان ازاماتتارىنىڭ مىسىر اۋەجايلارىنا كەلگەن بەتتە الدىن الا جۇگىنۋسىز ۆيزالار الا الاتىندىعىنا نازار اۋدارعىم كەلەدى. مىسىر تارتىمدى تۋريستىك باعىت بولىپ تابىلادى، سەبەبى، ءبىزدىڭ ەل جۇمساق كليماتىمەن جانە ايرىقشا گەوگرافيالىق ورنالاسۋىمەن ەرەكشەلەنەدى. بۇدان بولەك، مىسىر ارحەولوگيالىق، مادەني، ءدىني جانە ويىن- ساۋىقتىق كورىكتى جەرلەرىنىڭ الۋان تۇرلىلىگىمەن ەرەكشەلەنەدى. بۇگىندە مىسىر جوعارى ساپاداعى ءتۋريزمدى ۇسىنۋدا. ءتۇرلى اكتسيالار مەن باعدارلامالاردى قامتيتىن جارنالامالىق تۋريستىك ناۋقاندار وتكىزىلۋدە.
مەنىڭ بيىل اقپاندا استاناعا جاساعان ساپارىم بارىسىندا ءبىز پرەزيدەنت ن. نازاربايەۆپەن الماتىدان شارم- اش- شەيحكە تۇراقتى اۋە قاتىناسىن اشۋ تۋرالى ۋاعدالاستىققا قول جەتكىزدىك. 2016 -جىلدىڭ ناۋرىز ايىنان باستاپ، بۇعان قوسا، استانادان شارم- اش- شەيحكە تىكەلەي اۋە قاتىناسىن اشۋ بويىنشا جۇمىستار جۇرگىزىلۋدە.
- ءسىزدىڭ پىكىرىڭىزشە، ساياساتكەردىڭ بويىندا قانداي قاسيەتتەردىڭ، ونىڭ ىشىندە اسكەري قاسيەتتەردىڭ بولعانى ءجون؟
- اسكەري ءومىردىڭ اسا ماڭىزدى سيپاتتامالارى ءتارتىپ، بايىپتىلىق، تالاپشىلدىق جانە قويىلعان مىندەتتەرگە جەتۋدەگى دالدىك بولىپ تابىلادى. مەنىڭ ويىمشا، وسى قاسيەتتەردىڭ بارلىعى تەك ساياساتكەرگە عانا ەمەس، سونىمەن قاتار، الدىنا بەلگىلى ءبىر ماقسات قويعان كەز كەلگەن ادامعا قاجەت. ادەتتە، مۇنداي سۇراقتارعا كوبىنەسە ساياساتكەرلەردە ساياسي كەمەڭگەرلىك بولۋى كەرەك، باسىم مىندەتتەرگە قول جەتكىزۋدە ساياسي الاڭدا يكەمدەلە ءبىلۋى قاجەت دەپ جاۋاپ بەرىلىپ جاتادى. ءبىراق، مەنىڭ ويىمشا، قازىرگى زامان جاعدايىندا جانە بۇگىنگى بولىپ جاتقان بارلىق قاۋىپتەر، اتاپ ايتقاندا، تەرروريزم تۇرعىسىنان الىپ قاراعاندا، قازىرگى زاماننىڭ ساياساتكەرى شىنشىلدىعىمەن، ادالدىعىمەن، اشىقتىعىمەن، اقيقاتقا ۇمتىلۋشىلىعىمەن، ادالدىققا نەگىزدەلگەن ايقىن ساياسات ۇستانۋشىلىعىمەن ەرەكشەلەنۋى ءتيىس.
سۇحباتتاسقان ءىلياس وماروۆ
