قىزىلوردادا وبلىستىق تەرروريزمگە قارسى كوميسسيانىڭ كەزەكتەن تىس وتىرىسى ءوتتى - فوتو

قىزىلوردا. قازاقپارات - بۇگىن ءوڭىر باسشىسى قىرىمبەك كوشەربايەۆتىڭ توراعالىعىمەن وبلىستىق تەرروريزمگە قارسى كوميسسيانىڭ كەزەكتەن تىس وتىرىسى ءوتتى، دەپ حابارلادى اكىمدىكتىڭ باسپا ءسوز قىزمەتىنەن.

كوميسسيا وتىرىسى اقتوبە قالاسىندا ورىن العان لاڭكەستىك ارەكەتتىڭ سالدارىنان قازا بولعان اسكەري قىزمەتشىلەر مەن ازاماتتاردى ءبىر مينۋتتىق ۇنسىزدىكپەن ەسكە الۋدان باستالدى.

كەڭەس وتىرىسىنا قۇقىق قورعاۋ ورگاندارى مەن ارنايى قىزمەت جانە باسقارما باسشىلارى قاتىستى. كوميسسيا مۇشەلەرى اقتوبە قالاسىندا ورىن العان تەرروريستىك ارەكەتتەردى وبلىس اۋماعىندا بولدىرماۋ، ولاردىڭ الدىن الۋ ماسەلەلەرىن جان- جاقتى تالقىلادى.

وبلىس اكىمى اسىل ءدىنىمىزدىڭ اتىن جامىلىپ، قاسيەتتى رامازاننىڭ قارساڭىندا ەل ىشىنە بۇلىك سالىپ، جازىقسىز جانداردىڭ ءومىرىن قيعان اقتوبەدەگى قايعىلى وقيعا بارشا قازاقستاندىقتاردىڭ قابىرعاسىن قايىستىرعاندىعىن ايتىپ، بۇل وقيعا بارشامىزعا ساباق بولۋى ءتيىس دەپ ءتۇيدى.

- بەيبىت كۇندە مىلتىق اسىنىپ، قارۋ كەزەنىپ، ەلدىڭ بەرەكەسىن قاشىرعان توبىردىڭ بۇل ارەكەتى ادامدىققا دا، ەلدىككە دە جات. تاۋەلسىزدىكتىڭ قادىرىن بىلمەيتىن، بەيبىتشىلىكتىڭ تۇعىرىن شايقالتقىسى كەلگەن لاڭكەستىك توپتىڭ قولىنان ونداعان ادام مەرت بولدى جانە جاراقاتتاندى. تالاي شاڭىراق قارا جامىلىپ، قايعى جۇتىپ قالدى. اي مەن كۇننىڭ امانىندا ازاماتىنان ايىرىلۋ وتباسىنا دا، ەلگە دە وڭاي ەمەس.

ەل تىنىشتىعى مەن تۇتاستىعى ءۇشىن قازا تاپقان بوزداقتاردىڭ ەرلىگى ءاردايىم ەل ەسىندە ساقتالادى. سوندىقتان مەملەكەت باسشىسى 9 -ماۋسىمدى جالپىۇلتتىق ازا تۇتۋ كۇنى دەپ جاريالادى. قاندىقول قاراقشىلاردىڭ قولىنان قازا تاپقان ازاماتتاردىڭ ەرلىگىن تۇتاس ەل بولىپ ەسكە الىپ، قۇرمەت كورسەتۋگە شاقىرامىن. الاشتىڭ اناسى - سىر ەلى وسىنداي قيىن- قىستاۋ ساتتە اقتوبە جۇرتشىلىعىمەن بىرگە ەكەنىن ايتقىم كەلەدى. مۇنداي قايعىلى وقيعا ەندى ەشقاشان قايتالانباسىن. تاۋەلسىزدىگىمىزگە قاۋىپ تونبەسىن، - دەدى وبلىس اكىمى قىرىمبەك كوشەربايەۆ.

    

 اۆتور: ەلۋباي اۋەزوۆ