تەرروريستەر ولتىرگەن دوسبولدىڭ ورىندالماعان ارمانى - فوتو
11- سىنىپتى اياقتاعان دوسبول دوستارىنىڭ ورتاسىندا
اراعا 18 جىل سالىپ، كامەلەت جاسىنا جەتكەن دوسبولدىڭ تىلەگىن قۇپ كورگەن اتا- انا ونى باتىر بولسىن، وتانىنىڭ تىنىشتىعىن كۇزەتسىن دەپ اسكەرگە اتتاندىرادى. اناسى دوسبولدى ودان قايتىپ كورمەگەن دەسەدى، اكەسى بىلتىر انت قابىلداۋ راسىمىنە كۋا بولعان. اقتوبە قالاسىنداعى №6555 اسكەري بولىمىندە بورىشىن وتەپ جۇرگەن قاتارداعى جاۋىنگەر دوسبول ەركىنبەك ۇلى ساپار لاڭكەستەردىڭ وعىنا كەۋدەسىن توسىپ، اسكەري ءبولىمنىڭ قارۋ- جاراق قويماسىن امان ساقتاعان ادامنىڭ ءبىرى بولدى. وسىلايشا، وتان الدىنداعى، اتا- انا الدىنداعى انتىنا ادال كۇيىندە كوز جۇمدى.
س. ەرۋبايەۆ اتىنداعى ءوزى وقىعان مەكتەپتەگى شارانىڭ بىرىندە
دوسبولعا اسكەري ۇلگىدەگى كيىم قۇيىپ قويعانداي جاراسقان ەكەن. ءتىپتى، وقۋشى كەزىندە دوسبول اسكەري ادامعا ءتان سىمباتىمەن جاقىندارىن ءسۇيسىندىرىپ جۇرگەن.
دوسبول سىنىپتاستارىنىڭ اراسىندا
«بىرگە وقىعان وقۋشى كەزىمىزدە ونىڭ جامان قىلىق تانىتقانىن كورگەن ەمەسپىن» دەيدى بىزبەن سۇحباتتاسقان مارقۇم دوسبولدىڭ سىنىپتاسى جانار بايحودجايەۆا. «دوستارىنىڭ اراسىندا سىيلى بولعان دوسبول اتىنا زاتى ساي، باۋىرمال، دوس بولدى. قاراپايىمدىلىعى مەن سالماقتىلىعى وزىنە جاراساتىن» دەپ جانارىنا جاس الدى جانار.
(دوسبول مەن ءۇلزادا)
«دوسبول وتە باۋىرمال جىگىت ەدى»، - دەيدى دوسبولدىڭ تاعى ءبىر سىنىپتاسى ءۇلزادا ۇزاقباي. «ءبىز ءۇشىن ونىڭ ورنى ەرەكشە بولاتىن. دوسبول اقكوڭىل، باۋىرمال جىگىت ەدى. ول ءاردايىم كومەك قولىن سوزاتىن، ۇنەمى جايدارلى جۇرەتىن، ءوزىن بايسالدى ۇستايتىن» دەيدى كەۋدەسىنە وكسىك تولعان ءۇلزادا.
وقۋشى كەزىندەگى دوسبول
ءۇلزادا دوسبولدىڭ حالىق بىلمەيتىن ءبىر سىرىن اشتى. ول ات قۇلاعىندا ويناعان شاباندوز بولىپتى. ال، دوسبولدىڭ اسكەردەن كەلىپ ورىندايمىن دەگەن باستى ارمان- ماقساتى - قازاقستان قۇراماسى ءۇشىن كوكپار تارتىسۋ بولعان ەكەن...
امال قانشا، «ۇلىم باتىر بولادى» دەگەن اتا- انانىڭ دا، جۇيرىككە ءمىنىپ، كەڭ دالامدا ءبىر جۇيىتكىسەم عوي» دەگەن باتىردىڭ ارمانى دا 5 - ماۋسىم كۇنى تەرروريستەردىڭ قولىنان قازا تاپقان دوسبولدىڭ جۇرەگى توقتاعان ساتتە، جۇلدىزداي جەرگە اعىپ ءتۇستى...
اۆتور: كەنجەكەي توقتامۇرات قىزى
