تالعات بايسۋفينوۆ: قىتايعا جەڭىس ءۇشىن كەلدىك

استانا. قازاقپارات - بۇگىن قىتايدىڭ داليان قالاسىندا قازاقستان قۇراماسى قىتاي فۋتبولشىلارىمەن جولداستىق كەزدەسۋ وتكىزەدى.

وسىعان بايلانىستى اتالعان ەلدەردىڭ ۇلتتىق قۇرامالارى ويىن الدىندا باسپا ءسوز ءماسليحاتىن وتكىزدى.

بۇقارالىق اقپارات قۇرالدارىنىڭ باسىن قوسقان جيىنعا الدىمەن قىتاي قۇراماسىنىڭ باس باپكەرى گاو حۋنبو قاتىسىپ، الداعى وتەتىن ويىنعا بايلانىستى ءوز پىكىرىن ءبىلدىردى.

- قازاقستان قۇراماسى ءبىز ءۇشىن جۇمباق كوماندا. ءدال قازىر كوماندا ساپىندا كىمدەردىڭ وينايتىنىن تولىققاندى بىلمەيمىز. ءتىپتى قالاي وينايتىنى دا ءبىز ءۇشىن جۇمباق.

قازىر باپكەرلەر شتابىمەن بىرلەسە وتىرىپ، قازاقستاننىڭ ويىن ورنەگىن تالداپ جاتىرمىز. ىشكى بىرىنشىلىكتەرى مەن كوماندا تۋرالى دا اقپارات از بىزدە. ويتكەنى، ءبىز - ازيادا، قازاقستان ەۋروپادا دوپ تەۋىپ جۇرگەن ۇجىم، - دەدى قىتاي قۇراماسىنىڭ باس باپكەرى گاو حۋنبو.

قىتاي قۇراماسىنىڭ باس باپكەرىمەن بولعان باسپا ءسوز جيىنىنان كەيىن قازاقستان قۇراماسى باس باپكەرىنىڭ مىندەتىن ۋاقىتشا اتقارۋشى تالعات بايسۋفينوۆ تە جۋرناليستەر قاۋىمىنىڭ الدىندا جولداستىق كەزدەسۋگە بايلانىستى پىكىرىن ورتاعا سالدى. تالعات مارۋان ۇلىنىڭ ايتۋىنشا، فۋتبولشىلاردىڭ اراسىندا جاراقات العان ەشكىم جوق. ءبارى ويىنعا ساقاداي-ساي.

- قىتاي فۋتبولشىلارى تۋرالى تولىققاندى اقپارات الدىق. ونىڭ ۇستىنە جاقىندا عانا قارسىلاستارىمىز ترينيداد جانە توباگومەن جولداستىق كەزدەسۋ وتكىزدى. قۇراماداعى باپكەرلەرمەن بىرگە بۇل ويىندى باستان-اياق قاراپ شىقتىق. ەندى فۋتبولشىلارىمىزعا سول ويىن بارىسىن تالداپ، تەوريا جۇزىندە ءتۇسىندىرىپ وتەمىز. ودان كەيىن كىمدەردىڭ نەگىزگى قۇرامدا وينايتىنىن انىقتايمىز. وسىندا كەلگەندە ەكى ويىنشىمىزدىڭ ازداعان جاراقاتى بولعان ەدى. بۇگىن ولاردىڭ جاعدايى جاقسى. باسقا جاراقات العان ەشكىم جوق. فۋتبولشىلاردىڭ دايىندىقتارى ويداعىداي. بار كۇشتەرىن سالۋعا ساقاداي-ساي وتىر، - دەدى ت. مارۋان ۇلى.

تالعات بايسۋفينوۆ باسپا ءسوز ءماسليحاتى بارىسىندا جولداستىق ويىننىڭ ماڭىزدىلىعىن باسا ايتىپ ءوتتى. قىتاي جۋرناليستەرىنىڭ: «بۇل كەزدەسۋدە الدارىڭىزعا قانداي ماقسات قويىپ وتىرسىز؟» دەگەن سۇراعىنا تالعات مارۋان ۇلى بىلاي دەپ جاۋاپ بەردى:

- قازاقستان دەلەگاتسياسىنىڭ قۇرامىندا كەمىندە 40 ادام بار. ونىڭ ىشىندە 23 فۋتبولشى، باپكەرلەر شتابى، جانكۇيەرلەر جانە بۇقارالىق اقپارات قۇرالدارى وكىلدەرى بار. ءبىز بۇل جەرگە جاي كەلگەن جوقپىز. جىگىتتەر ناتيجە ءۇشىن، جەڭىس ءۇشىن وينايدى. الەم چەمپيوناتىنىڭ ىرىكتەۋ ويىندارىنىڭ باستالۋىنا كوپ ۋاقىت قالمادى. سوندىقتان، دايىندىق بارىسىن پىسىقتاپ العانعا مۇنداي جولداستىق كەزدەسۋدىڭ ماڭىزى ءبىز ءۇشىن وتە زور...

قىتاي جۋرناليسىنىڭ ءبىرى قازاقستان قۇراماسىنىڭ ساپىندا «استانا» كومانداسىنىڭ ويىنشىلارى كوپ ەكەندىگىن ايتىپ، ولاردىڭ ەرتەڭگى ويىنعا شىعۋى مۇمكىن بە دەگەن ساۋال تاستادى. ءوز كەزەگىندە تالعات مارۋان ۇلى ۇلتتىق قۇرامانىڭ ءاربىر شەبىندە باسەكەلەستىكتىڭ جوعارى ەكەنىن، وندا تەك «استانا» كومانداسىنىڭ فۋتبولشىلارى عانا وينامايتىنىن جەتكىزدى.

- ءيا، ءبىزدىڭ قۇرامادا «استانا» كومانداسىنىڭ ءبىراز ويىنشىلارى بار. تەك «استانانىڭ» عانا ەمەس، ىشكى بىرىنشىلىكتە كوش باستاپ كەلە جاتقان كوماندالاردان دا ويىنشىلار كوپتەپ شاقىرىلدى. كەلە الماعاندارى قانشاما. بۇل ۇلتتىق قۇرامانىڭ ويىنى. سوندىقتان تەك «استانانىڭ» ويىنشىلارىن عانا شىعارمايمىن. ويىن كەزىندە التى فۋتبولشى اۋىستىرۋعا مۇمكىندىك بار. مەن سونىڭ بارلىعىن پايدالانامىن، - دەدى ت. بايسۋفينوۆ.

«الامان»