قاسىم- جومارت توقايەۆ: اقتوبەدەگى ورازا ايى الدىنداعى تەراكت - شەكتەن شىققان ارسىزدىقتىڭ كورىنىسى

استانا. قازاقپارات - اقتوبەدەگى ورازا ايى الدىنداعى تەراكت - شەكتەن شىققان ارسىزدىقتىڭ كورىنىسى، دەپ مالىمدەدى ق ر پارلامەنتى سەناتىنىڭ سپيكەرى قاسىم- جومارت توقايەۆ.

«اقتوبەدەگى ورازا ايى الدىنداعى تەراكت - شەكتەن شىققان ارسىزدىق پەن قىلمىسكەرلەردىڭ قاتىگەزدىگىنىڭ كورىنىسى. ولاردى جازالاۋ ءۇشىن ەڭ قاتال شارالار قولدانىلىپ جاتىر»، - دەپ جازدى ق. توقايەۆ Twitter- دەگى ءوز پاراقشاسىندا.

 «ناقتىلانعان دەرەكتەر بويىنشا، قىلمىسكەرلەر استانا ۋاقىتى بويىنشا 15:45-تە اقتوبەدەگى «پاللادا» قارۋ- جاراق دۇكەنىنە شابۋىل جاساپ، دۇكەننىڭ ساتۋشىسىن جانە «جەدەل كۇزەت» كۇزەت اگەنتتىگىنىڭ قىزمەتكەرىن ولتىرگەن. بۇدان بولەك وقيعا ورنىنا كەلىپ جەتكەن ءۇش پوليتسەيگە وق اتىپ، جاراقاتتاعان. «پانتەرا» اتتى قارۋ- جاراق دۇكەنىنە شابۋىل جاساۋ كەزىندە كەلۋشىلەردىڭ ءبىرىن ءولتىرىپ، ەكىنشىسىن جارالاعان. بۇل جەرگە كەلىپ جەتكەن پوليتسيا ناريادىمەن ارادا اتىس بولىپ، ءۇش قىلمىسكەردىڭ كوزى جويىلدى، بىرەۋى قولعا ءتۇستى.

ۇلتتىق ۇلان اسكەري بولىمىنە شابۋىل جاساۋ ءۇشىن سودىرلار باعدارلىق اۆتوبۋستى جۇرگىزۋشى مەن جولاۋشىلاردى شىعارىپ جىبەرىپ، باسىپ العان. كەيىن اۆتوبۋسپەن اسكەري ءبولىم داربازاسىن سوعىپ كىرىپ، كوزگە كورىنگەن ادامدى اتا باستاعان. سولايشا ءۇش اسكەري قىزمەتكەردى ءولتىرىپ، التاۋىن جارالاعان. كەزەكشى قاراۋىل قارۋ قولدانىپ، قىلمىسكەرلەردىڭ بەتىن قايتارعان. وقيعا ورنىنا جەتكەن پوليتسيا ناريادىمەن بىرلەسە وتىرىپ ءبىر سودىردى ءولتىرىپ، ەكىنشىسىن جارالاعان جانە قولعا تۇسىرگەن.

جالپى، اقتوبەدە انتي تەررورلىق وپەراتسيا كەزىندە 4 سودىردىڭ كوزى جويىلىپ، 7-ەۋى قولعا ءتۇستى. ونىڭ ەكەۋى جارالانعان. قازىرگى كەزدە قالعان قىلمىسكەرلەردى تابۋ ءۇشىن بارلىق امالدار جاسالىپ جاتىر»، - دەدى ا. سادۋبايەۆ.

الدىن الا بولجام بويىنشا، شابۋىلدى تەرىس اعىمداعى ءدىن ۇستانۋشىلار جاساعان. اقتوبە قالاسىندا انتي تەررورلىق وپەراتسيا رەجىمى جاريالاندى. ويىن- ساۋىق مەكەمەلەرىنىڭ جۇمىسى مەن قوعامدىق كولىك قاتىناسى توقتاتىلدى.