الماتىدا قازاقستاندىق كاسىپقوي بوكسشى قانات يسلام شەبەرلىك سىنىبىن وتكىزدى
«مەن قازىر WBA تۇجىرىمى بويىنشا الەمدە بەسىنشى ورىندا تۇرمىن. ەندىگى جەكپە- جەكتەردىڭ بارلىعى وتە ماڭىزدى بولماق. سايكەسىنشە، بيىلعى جىلى كۇزدە نەمەسە كەلەسى جىلدىڭ باسىندا ماڭىزدى جەكپە- جەگىم ءوتۋى ىقتيمال. ءتىپتى، الداعى تامىز ايىندا دا وسىنداي كەزدەسۋلەردىڭ ءبىرى ۇيىمداستىرىلۋى مۇمكىن. قازىر، مەنىڭ كومانداممەن ءبىرقاتار بەلگىلى پروموۋتەرلىك ۇيىمدار كەلىسسوزدەر جۇرگىزىپ جاتىر. مەن ءوزىم چەمپيوندىق اتاققا تالاسۋعا دايىنمىن. سول ءۇشىن، بۇگىن جاتتىعۋىمدى باستاپ جىبەردىم»، - دەدى قانات يسلام.
ءوز كەزەگىندە وسى «AIDAR CLASSIS» كاسىپقوي بوكس كلۋبىنىڭ ديرەكتورى، اۋەسقوي بوكستان قازاقستاننىڭ بىرنەشە دۇركىن چەمپيونى، بۇگىندە كاسىپقوي بوكستان وتاندىق Diamond Ring پروموۋتەرلىك ۇيىمىنىڭ قۇرامىندا ونەر كورسەتىپ جۇرگەن ايدار شارىبايەۆ جاستاردىڭ بوكس جۇلدىزدارىمەن كەزدەسىپ تۇرۋى وتە ماڭىزدى ەكەندىگىن ايتتى.
«بوكس - قازاقستاندا ءنومىرى ءبىرىنشى سپورت ءتۇرى. بۇل قازاقتىڭ قانىنا جاقىن سپورت. جۇدىرىقتاسۋ، كۇرەسۋ ءبىز ءۇشىن ۇيرەنشىكتى ونەر. قازاقتىڭ بالالارى ءبىر- بىرىمەن الىسىپ وسەدى عوي. دەگەنمەن، ءبىز قاشاندا ەرتەڭگى كۇندى ويلاۋىمىز كەرەك. ول ءۇشىن بوكسقا دەن قويعان جاستارىمىزدى تەك جاتتىقتىرىپ، جارىستارعا قاتىستىرىپ قانا قويماي، ولاردى قازىر بوكس الەمىندە داڭققا بولەنىپ جۇرگەن، بيىك جەتىستىكتەرگە قول جەتكىزگەن اعالارىمىزبەن تۇراقتى تۇردە كەزدەستىرىپ تۇرۋىمىز كەرەك. مۇنىڭ كەزدەسۋلەردىڭ جاستارعا بەرەر تاربيەلىك ءمانى وتە زور. ولار الدىڭعى ۇرپاق اعالارىن ۇلگى تۇتىپ، ەلىن سۇيگەن ازامات بولىپ وسەتىن بولادى»، - دەدى ا. شارىبايەۆ.
ايتا كەتەلىك، «AIDAR CLASSIS» كاسىپقوي بوكس كلۋبىندا كوپ بالالى جانە الەۋمەتتىك از قامتىلعان وتباسىلاردىڭ بالالارى تەگىن جاتتىعا الادى.
ال شەبەرلىك سىنىبى وتە قارقىندى جانە قىزىقتى ءوتتى. وعان قاتىسقان جاستار اتاقتى بوكسشىنىڭ ءاربىر قيمىل- قوزعالىسىن قالت جىبەرمەي باقىلاپ، ايتقان اقىل- كەڭەستەرىن زەيىن قويىپ تىڭدادى جانە كورگەن- بىلگەندەرىن كەيىن جەكە جاتتىعۋ بارىسىدا جۇزەگە اسىرۋعا تىرىستى.
ال قانات يسلام جاستاردىڭ قويعان ءار ءتۇرلى سۇراقتارىنىڭ بارلىعىنا ەرىنبەي ريزا كوڭىلمەن جاۋاپ بەردى.
اۆتور: ايبوتا جاپپاربەرگەن
