ءدىنارالىق كەلىسىم مەن بەيبىتشىلىكتى دامىتۋدا پارلامەنتتىك ديپلوماتيانىڭ ماڭىزى زور
اتاپ ايتقاندا، كوميتەت ءتوراعاسى قازاقستان استاناسىنا بەسىنشى مارتە كەلىپ وتىرعان ماجارستاننىڭ مەملەكەتتىك جينالىسى كوميتەتى ءتوراعاسىنىڭ ورىنباسارى مارتون دەندەشيمەن كەزدەستى. وندا مارتەبەلى مەيمان ەلباسى ن. ءا. نازاربايەۆتىڭ قازاقستاندىق قوعامدا بەيبىتشىلىك پەن كەلىسىمدى نىعايتۋ بويىنشا جۇرگىزىپ وتىرعان ساياساتىنا جوعارى باعا بەردى.
ءوز كەزەگىندە ەلدەردىڭ تاريحي تامىرىلاستىعىن اتاپ وتكەن م. اشىمبايەۆ قازاقستان مەن ماجارستان اراسىندا ەكىجاقتى ىقپالداستىقتىڭ الەۋەتى زور ەكەندىگىن اتاپ ءوتتى. «قازاقستان پرەزيدەنتى ن. نازاربايەۆ دىندەر مەن كونفەسسيالاردى جاقىنداستىرۋدا، الەمدە ساياسي مادەنيەتتىڭ، ديالوگ پەن ارەكەتتەستىكتىڭ تارالۋىنا زور كۇش قوسۋدا»، - دەدى دەپۋتات م. اشىمبايەۆ.
ال م. دەندەشيدىڭ ايتۋىنشا ءدىنارالىق تاتۋلىق ساياساتىندا قازاقستان مەن ماجارستاننىڭ تاريحي ۇستانىمدارى ورتاق. «ماسەلەن، ماجارستاندا دا ءتۇرلى ەتنوستار مەن دىندەردىڭ وكىلدەرى ءومىر ءسۇرىپ جاتىر. سوسىن ماجار حالقى XVI عاسىردىڭ وزىندە-اق ءتۇرلى دىندەر اراسىنداعى بەيبىتشىلىك تۋرالى دەكلاراتسيا قابىلداعان. ماجارستان ءۇشىن قازاقستان - ەرەكشە ەل جانە ەرەكشە ارىپتەس، جانە بۇل ءبىر-بىرىنەن قاشىق ەلدەردىڭ ءوزارا بايلانىسى باسقا مەملەكەتتەر ءۇشىن ۇلگى بولا الادى»، - دەدى مەيمان.
سونداي-اق، بۇگىن ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ ءتوراعاسى ماۋلەن اشىمبايەۆ يندونەزيا رەسپۋبليكاسىنىڭ وكىلدەر پالاتاسىنىڭ دەپۋتاتتارى مۋحامماد ارۆاني تحومافي جانە ح. مۋحليسينيمەن كەزدەستى. وندا قازاقستان مەن يندونەزيا اراسىنداعى ساۋدا-ەكونوميكالىق بايلانىستاردىڭ، ونىڭ ىشىندە تۋريستىك بايلانىستاردىڭ نىعايۋى ماسەلەلەرى تالقىلاندى. «دىندەر تەرروريزمگە قارسى» حالىقارالىق كونفەرەنتسياسىنىڭ اياسىندا وتكەن كەزدەسۋدە پارلامەنتتەر اراسىنداعى بايلانىستاردى نىعايتۋ قاجەتتىلىگىنە نازار اۋدارىلدى. تاراپتار بۇنداي كەزدەسۋلەر پارلامەنتتىك ديپلوماتيانىڭ ماڭىزىن ارتتىراتىندىعىن اتاپ ءوتتى. كەزدەسۋ بارىسىندا م. اشىمبايەۆ قوناقتارعا مەملەكەت باسشىسى ن. نازاربايەۆتىڭ «الەم. XXI عاسىر» مانيفەستىن تاپسىردى.
اۆتور: قانات مامەتقازى ۇلى
