ن. نازاربايەۆ: ە ا ە و- نىڭ بىرىكتىرىلگەن نارىعى شىعىس پەن باتىس اراسىنداعى بايلانىستىرۋشى بۋىنعا اينالۋى ءتيىس
بۇل تۋرالى بۇگىن اقوردادا ءوتىپ جاتقان جوعارى ەۋرازيالىق ەكونوميكالىق كەڭەستىڭ كەڭەيتىلگەن قۇرامداعى وتىرىسىندا ەلباسى نۇرسۇلتان نازاربايەۆ ءمالىم ەتتى.
«ە ا ە و- نىڭ بىرىكتىرىلگەن نارىعى شىعىس پەن باتىس اراسىنداعى بايلانىستىرۋشى بۋىنعا اينالۋعا مىندەتتى. ءبىزدىڭ وداق اياسىنداعى تاۋارلار مەن قىزمەتتەردى ەركىن ىلگەرىلەتۋ قىتاي باسشىسى ۇسىنعان «جىبەك جولى» ەكونوميكالىق بەلدەۋى باستاماسىمەن سايكەس كەلەدى. بۇل جوبا ءبىزدىڭ ەلدەرىمىز ءۇشىن ەكونوميكالىق پايدا مەن ءوزارا مۇددەلەستىكتى پاش ەتەتىن ىنتىماقتاستىق سالالارىن وزىنە قامتۋدى كوزدەپ وتىر»، - دەدى ەلباسى.
ق ر پرەزيدەنتى قازاقستاندا «نۇرلى جول» باعدارلاماسى قولعا الىنعانى، ونىڭ اياسىندا ينفراقۇرىلىمدىق نىسانداردى الۋ جانە جاڭعىرتۋ جۇمىستارى جۇرگىزىلىپ جاتقانىن اتاپ ءوتتى.
«ولار - «باتىس ەۋروپا - باتىس قىتاي» ءدالىزى، «قازاقستان- تۇركىمەنستان-يران-پارسى شىعاناعى» تەمىر جولى سىندى جوبالار. قىتايدا، تىنىق مۇحيتىندا قازاقستاندىق لوگيستيكالىق تەرمينال ليانيۋنگاندا جۇمىس ىستەپ تۇر. كاسپي جاعالاۋىندا جاڭا تەڭىز پورتىنىڭ قۇرىلىسى جۇرگىزىلۋدە. وسىلايشا، قازاقستان اۋقىمدى ينفراقۇرىلىمدىق جوبالاردى جۇزەگە اسىرۋ ارقىلى وسىناۋ كولىك تارماقتارى ارقىلى ءوڭىرارالىق ىنتىماقتاستىق ءۇشىن مىعىم تۇعىرناما قالىپتاستىرۋدا»، - دەدى ن. نازاربايەۆ.
اۆتور: مارلان جيەمباي
