ن. نازاربايەۆ: ە ا ە و ەۋروپا مەن ازيا اراسىنداعى سەنىمدى كوپىرگە اينالۋى ءتيىس
بۇل تۋرالى بۇگىن اقوردادا ءوتىپ جاتقان جوعارى ەۋرازيالىق ەكونوميكالىق كەڭەستىڭ كەڭەيتىلگەن قۇرامداعى وتىرىسىندا ەلباسى نۇرسۇلتان نازاربايەۆ ءمالىم ەتتى.
«بۇكىل الەمدە ءبىزدىڭ ەكونوميكالىق بىرلەستىگىمىزگە قىزىعۋشىلىق ارتىپ، وداق حالىقارالىق بايلانىستاردى بارىنشا قارقىندى دامىتۋ ۇستىندە ەكەندىگىن بىلەمىز. وسىعان وراي، بيىل ۇيىمنىڭ ءتوراعاسى رەتىندە مەنىڭ ۇسىنىسىممەن بۇل جىل ە ا ە و- نىڭ ءۇشىنشى ەلدەرمەن جانە باستى ينتەرگاتسيالىق بىرلەستىكتەرمەن ەكونوميكالىق قارىم-قاتىناستى تەرەڭدەتۋ جىلى دەپ جاريالاندى»، - دەدى مەملەكەت باسشىسى.
ەلباسى ە ا ە و الەمدىك ەكونوميكالىق جۇيەگە تولىققاندى ينتەگراتسيالانعان اشىق قوعامداستىق رەتىندە قۇرىلىپ، بولاشاقتا ەۋروپا مەن ازيا اراسىنداعى سەنىمدى كوپىرگە اينالۋى تيىستىگىن باسا ايتتى.
«وتكەن جىلى ۆەتناممەن ەركىن ساۋدا ايماعىن قۇرۋ تۋرالى ءبىرىنشى شارتقا قول قويىلدى. بۇگىن ءبىز شاعىن قۇرامدا ق ح ر، ءۇندىستان، يزرايل، مىسىر، يران، كامبودجا جانە كوپتەگەن باسقا دا ەلدەرمەن ىنتىماقتاستىق ماسەلەسىن تالقىلادىق. ە ا ە و- نىڭ ە و، ش ى ۇ، اسەان جانە باسقا ينتەگراتسيالىق بىرلەستىكتەرمەن ساۋدا-ەكونوميكالىق بايلانىستارىن جولعا قويۋ مۇمكىنشىلىگىن جەكە قاراستىردىق»، - دەدى ن. نازاربايەۆ.
ايتا كەتەيىك، كەڭەس جۇمىسىنا قازاقستان رەسپۋبليكاسى پرەزيدەنتى نۇرسۇلتان نازاربايەۆ، ارمەنيا پرەزيدەنتى سەرج سارگسيان، بەلارۋس پرەزيدەنتى الەكساندر لۋكاشەنكو، قىرعىز رەسپۋبليكاسىنىڭ پرەزيدەنتى المازبەك اتامبايەۆ جانە رەسەي فەدەراتسياسى پرەزيدەنتى ۆلاديمير پۋتين قاتىسۋدا.
اۆتور: مارلان جيەمباي
