ق. توقايەۆ قىتاي، گەرمانيا، مىسىر جانە حالىقارالىق بەيبىتشىلىك ينستيتۋتىنىڭ دەلەگاتسيالارىمەن كەزدەستى
بۇل تۋرالى سەناتتىڭ باسپا ءسوز قىزمەتىنەن حابارلاندى.
سەنات باسشىسى «دىندەر تەرروريزمگە قارسى» كونفەرەنتسياسىنا قاتىسقانى ءۇشىن جۇزدەسۋشىگە ريزاشىلىعىن ءبىلدىردى جانە بۇل شارا تەرروريزم قاتەرىنە بىرلەسە ارەكەت ەتۋ جولدارىن اشىق تالقىلاۋ ءۇشىن ورتاق الاڭ ۇسىنعانىن اتاپ ءوتتى.
تاراپتار سونداي-اق ەكىجاقتى ىنتىماقتاستىق، ونىڭ ىشىندە پارلامەنتارالىق بايلانىستار ماسەلەلەرىن تالقىلادى. كەزدەسۋ بارىسىندا قازاقستان پرەزيدەنتى نۇرسۇلتان نازاربايەۆ جاريا ەتكەن «نۇرلى جول» جاڭا ەكونوميكالىق ساياساتى مەن ق ح ر ءتوراعاسى شي جينپيڭنىڭ «ءبىر بەلدەۋ، ءبىر جول» تۇجىرىمداماسى ۇزاق مەرزىمدى ءوزارا ءىس-قيمىل كەلەشەگىنىڭ جالپى كورىنىسى مازمۇندالعانى تۋرالى ورتاق پىكىرگە كەلدى.
استاناداعى «دىندەر تەرروريزمگە قارسى» اتتى فورۋم اياسىندا سەنات ءتوراعاسى گ ف ر بۋندەستاگىنىڭ دەپۋتاتى اكسەل فيشەرمەن، مىسىردىڭ ءمينيسترى مۇحتار جۇمامەن جانە حالىقارالىق بەيبىتشىلىك ينستيتۋتىنىڭ پرەزيدەنتى تەرە رود-لارسەنمەن دە كەزدەستى. جۇزدەسۋشىلەر حالىقارالىق كۇن تارتىبىندەگى ماسەلەلەر بويىنشا پىكىر الماستى. كونفەرەنتسياعا قاتىسۋشىلار تەرروريزم جانە ەكسترەميزممەن كۇرەستەگى جاھاندىق كۇش-جىگەرگە سىندارلى يدەيالارى مەن ءوز ۇلەستەرىن قوسۋعا ازىرلىگىن بىلدىرگەن پارلامەنتشىلەر مەن الەمنىڭ ءدىني قايراتكەرلەرىنىڭ ءبىر الاڭعا جينالعان وسى فورۋم تاقىرىبىنىڭ ماڭىزدىلىعىن اتاپ ءوتتى.
اۆتور: قانات مامەتقازى ۇلى
