تەرروريزمگە قارسى كوپجاقتى ستراتەگيالىق ارەكەتتەردى قابىلداۋ ءۇشىن الەم بولىپ جۇمىلاتىن ۋاقىت كەلدى - امال ابداللا ال- كۋبەيسي
بۇگىن استانادا «دىندەر تەرروريزمگە قارسى» اتتى حالىقارالىق كونفەرەنتسيا بارىسىندا ءسوز سويلەگەن بىرىككەن اراب امىرلىكتەرى فەدەرالدى ۇلتتىق كەڭەسىنىڭ ءتورايىمى دوكتور امال ابداللا ال- كۋبەيسي وسىلاي مالىمدەدى.
«تەرروريزم ادامزات وركەنيەتىنە ۇلكەن قاتەر ءتوندىرىپ كەلەدى. ءبىزدىڭ الدىمىزدا تەرروريزمنىڭ بارلىق تۇرلەرىن تۇبەگەيلى جويۋ ءۇشىن قولدان كەلگەنشە جۇزەگە اسىراتىن ادامگەرشىلىك، ەتيكالىق جاۋاپكەرشىلىكتەر تۇر. ايتپەسە، ءبىز جارقىن بولاشاقتى قامتاماسىز ەتە المايمىز. ءبىز تەرروريزممەن كۇرەستە قولىمىزدان كەلەتىن بارلىق كۇشتەردى جۇمىلدىرۋعا ءتيىسپىز. تەرروريزمگە قارسى كوپجاقتى ستراتەگيالىق ارەكەتتەردى قابىلداۋ ءۇشىن الەم بولىپ جۇمىلاتىن ۋاقىت كەلدى»، - دەدى امال ابداللا.
ونىڭ ايتۋىنشا، تەررورلىق اكتىلەر اسا قاۋىپتى اۋرۋلار بەلگىلەرىن كورسەتىپ وتىر. وسىعان وراي، سپيكەر بۇنداي «بەلگىلەردى» جويىپ، ولاردى تۇبىرىمەن جويۋ شارالارىنا نازار اۋداردى. «ارينە، بىزگە بەلگىلىسى اۋرۋدىڭ بەلگىلەرى عانا. ال ونىڭ شىعۋ توركىنىنە كەلەر بولساق، ولار: كەدەيشىلىك، بىلىمسىزدىك، باسقالاردى سىيلاماۋ، توزىمسىزدىكتىڭ جوقتىعى. سوندىقتان دا، ءبىز تەرروريزممەن كۇرەس تۋرالى ايتساق، وندا وسىنداي تۇبىرلەرگە قارسى كەڭ اۋقىمدى شارالاردى قولعا الۋعا ءتيىسپىز. ماسەلەن، سونىڭ ءبىرى كەدەيلىكتى جويۋ. ب ۇ ۇ دەرەكتەرىنە سايكەس، بۇگىنگى تاڭدا الەمدە 830 ميلليوننان استام ادام كەدەيلىكتىڭ شەگىندە ءومىر سۇرۋدە. جۇمىس ىستەپ، كۇنىنە تەك ەكى دوللارعا ءناپاقا تاباتىندار سانى قانشاما. ال ءبىر دوللارعا كۇنەلتەتىن كەدەي حالىقتىڭ باسىم بولىگى ازيانىڭ وڭتۇستىك بولىگىندە، افريكاداعى ساحارادا تۇرىپ جاتىر. بۇل ادامزاتتىڭ الدىنداعى زور قاسىرەت»، - دەدى امال ابداللا.
اۆتور: قانات مامەتقازى ۇلى
