ب. ىزمۇحامبەتوۆ پەن ك. مۋتتونەن پارلامەنتارالىق بايلانىستى دامىتۋعا نيەت ءبىلدىردى

استانا. قازاقپارات - بۇگىن ءماجىلىس ءتوراعاسى باقتىقوجا ىزمۇحامبەتوۆ ەۋروپاداعى قاۋىپسىزدىك جانە ىنتىماقتاستىق ۇيىمىنىڭ پارلامەنتىك اسسامبلەياسى ءتوراعاسىنىڭ ورىنباسارى، ورتالىق جانە شىعىس ازياداعى ۇيىمنىڭ ارنايى وكىلى كريستين مۋتتونەنمەن كەزدەستى، دەپ حابارلادى ءماجىلىستىڭ باسپا ءسوز قىزمەتىنەن.

تاراپتار ءوزارا ارەكەتتەستىكتى دامىتۋدىڭ باعىتتارىن تالقىلادى. بۇل رەتتە ماجىلىستە قايتا قۇرىلعان ە ق ى ۇ پ ا- پەن ارەكەتتەستىك بويىنشا دەلەگاتسيا قۇرامىنا ماڭىزدى مىندەتتەر قويىلادى.

ب. ىزمۇحامبەتوۆ پەن ك. مۋتتونەن پارلامەنتارالىق قاتىناستاردى جەتىلدىرۋ كوپجاقتى قاتىناستاردى تەرەڭدەتۋ مەن كەڭەيتۋگە قاجەتتى شارت بولىپ تابىلاتىندىعىن ايتتى.

قازاقستاننىڭ ە ق ى ۇ پارلامەنتتىك اسسامبلەياسىنىڭ ماڭىزدى بولىگى بولىپ تابىلاتىندىعىنا نازار اۋدارعان كريستين مۋتتونەن ءبىزدىڭ ەلىمىزدىڭ ەلدەر، ۇلتتار جانە ءتۇرلى توپتار اراسىنداعى ديالوگتى ورناتۋداعى ەرەكشە ءرولىن اتاپ ءوتتى.

- ءبىزدىڭ ىقپالداستىعىمىزدى جوعارى باعالايمىز جانە ونى جالعاستىرۋعا نيەتتىمىز. قازاقستان بۇل باعىتتا وتە جاقسى جۇمىس جاساپ جاتىر جانە وسى ايماقتاعى باسقا مەملەكەتتەرگە ۇلگى بولا الادى، - دەدى ك. مۋتتونەن.

قازىرگى زاماننىڭ حالىقارالىق قاتەرلەرى تۋرالى ءسوز قوزعاعان ب. ىزمۇحامبەتوۆ، ك. مۋتتونەن قاتىسقالى وتىرعان استانا قالاسىندا وتەتىن «دىندەر لانكەستىككە قارسى» اتتى حالىقارالىق كونفەرەنتسياسىنىڭ بۇل قاۋىپكە قارسى كۇش بىرىكتىرۋگە جاعداي جاسايتىندىعىنا سەنىم ءبىلدىردى.

كەزدەسۋ بارىسىندا استانا قالاسىندا «ەكسپو-2017» حالىقارالىق مامانداندىرىلعان كورمەسىن وتكىزۋ ماسەلەلەرى تالقىلاندى. پارلامەنت ءتوراعاسى بۇل شاراعا ەۋروپاداعى قاۋىپسىزدىك جانە ىنتىماقتاستىق ۇيىمىن وعان ىڭعايلى نىساندا قاتىسۋعا شاقىردى.

- مەن سىزدەردى كورمەنىڭ تاقىرىبىمەن قۇتتىقتايمىن. پارلامەنتتىك اسسامبلەيا ءۇشىن بۇل كورمەگە قاتىسۋ وتە ماڭىزدى دەپ سانايمىن، - دەدى ك. مۋتتونەن.