قازاقستان بىرىككەن اراب امىرلىكتەرىمەن پارلامەنتارالىق بايلانىستاردى قالىپتاستىردى

استانا. قازاقپارات - ق ر سەنات ءتوراعاسى قاسىم-جومارت توقايەۆ قازاقستانعا العاش رەت رەسمي ساپارمەن كەلگەن بىرىككەن اراب امىرلىكتەرى فەدەرالدىق ۇلتتىق ءماجىلىسىنىڭ ءتورايىمى امال ابداللا ءال-كۋبەيسيمەن كەلىسسوز جۇرگىزدى.

سەنات ءتوراعاسى ا. ءال-كۋبەيسيدىڭ ساپارى ەكى ەلدىڭ پارلامەنتارالىق ءۇن قاتىسۋدى ورناتۋ تۇرعىسىندا قازاقستان مەن ب ا ءا اراسىنداعى جەمىستى ىنتىماقتاستىقتى نىعايتۋعا زور ۇلەس قوساتىنىن اتاپ ءوتتى. ق. توقايەۆ قازاقستان پارلامەنتىنىڭ قىزمەتى جانە پرەزيدەنت نۇرسۇلتان نازاربايەۆتىڭ بەس ينستيتۋتتىق رەفورماسىن زاڭنامالىق تۇرعىدا قامتاماسىز ەتۋ تۋرالى ا. ءال-كۋبەيسيدى حاباردار ەتتى.

سەنات ءتوراعاسى 31- مامىردا استانادا وتەتىن، پارلامەنتشىلەر، ءدىني قايراتكەرلەر جانە حالىقارالىق ۇيىمداردىڭ باسشىلارى قاتىساتىن «دىندەر تەرروريزمگە قارسى» حالىقارالىق كونفەرەنتسياسىنا كەلگەنى ءۇشىن ريزاشىلىق ءبىلدىردى. بۇل تۇرعىدا ق. توقايەۆ ءدىنارالىق جانە مادەنيەتارالىق كەلىسىمدى نىعايتۋ سالاسىنداعى بىرىككەن اراب امىرلىكتەرىنىڭ كۇش-جىگەرىن قولدادى.

ا. ءال-كۋبەيسي قازاقستانعا كەلۋگە شاقىرعانى ءۇشىن ق. توقايەۆقا العىس ايتتى. فەدەرالدىق ۇلتتىق ءماجىلىسى ءتورايىمىنىڭ ايتۋىنشا، قازاقستان مەن ب ا ءا اراسىندا ەرەكشە دوستىق قاتىناستار مەن ساۋدا-ەكونوميكالىق، مادەني-گۋمانيتارلىق جانە باسقا سالالارداعى ىنتىماقتاستىق قالىپتاستى.

ب ا ءا پارلامەنتىنىڭ ءتورايىمى «دىندەر تەرروريزمگە قارسى» كونفەرەنتسياسىنىڭ اسا قاجەتتىگىن، ويتكەنى، ءدىندى قارالايتىن ەكسترەميزم يدەولوگياسىنا بىرلەسە توتەپ بەرۋ جانە يسلامنىڭ بەيبىتشىلىك سۇيگىش نەگىزدەرىن ءتۇسىندىرۋ قاجەتتىگىن اتاپ ءوتتى. وسىعان بايلانىستى، ونىڭ پىكىرىنشە، دۇنيە ءجۇزى پارلامەنتشىلەرىنىڭ فورۋمىنا قاتىسۋ اسا ماڭىزدى.