ينۆەستورلار قازاقستاندى ورتالىق ازياداعى ينۆەستيتسياعا ەڭ قولايلى ەل دەپ سانايدى - ن. نازاربايەۆ
بۇل تۋرالى بۇگىن ق ر پرەزيدەنتى جانىنداعى شەتەل ينۆەستورلارى كەڭەسىنىڭ 29- وتىرىسىندا ەلباسى نۇرسۇلتان نازاربايەۆ ايتتى.
«ءبىزدىڭ ەلىمىزدە تىكەلەي جۇمىس ىستەيتىن ينۆەستورلاردىڭ باعالاۋىنشا، بۇگىندە قازاقستاندا ينۆەستورلار ءۇشىن وڭىردەگى ۇزدىك جاعداي جاسالعان. ماسەلەن، حالىقارالىق قارجى ۇيىمدارىمەن، ياعني دۇنيەجۇزىلىك بانك، ەۋروپالىق قايتا قۇرۋ جانە دامۋ بانكى، ازيا دامۋ بانكىمەن ىنتىماقتاستىق باعدارلاماسى اياسىندا تاياۋداعى 5 جىلدا، ءبىزدىڭ ۋاعدالاستىعىمىزعا سايكەس كاسىپكەرلىكتى، قارجىلىق ينفراقۇرىلىمداردى، ەلەكتر ەنەرگەتيكاسىن دامىتۋعا، سونىمەن قاتار ينستيتۋتتىق رەفورمالاردى جۇرگىزۋگە شامامەن 9 ميلليارد دوللار تارتىلادى»، - دەدى مەملەكەت باسشىسى.
ق ر پرەزيدەنتىنىڭ اتاپ وتۋىنشە، ورتالىق ازيا جانە ءوڭىردىڭ باسقا دا ەلدەرى قازاقستان سياقتى حالىقارالىق قارجى ينستيتۋتتارىنىڭ سەنىمىنە يە بولىپ وتىرعان جوق. ولار قازاقستاننان وزگە ەلدەرگە مۇنداي كولەمدە قارجى قۇيعان ەمەس.
ەلباسى يندۋستريالاندىرۋ باعدارلاماسىن قولداۋعا شامامەن 10 ميلليارد دوللار شەتەلدىك ينۆەستيتسيا تارتىلىپ جاتقاندىعىن دا ەسكە سالىپ ءوتتى. ينۆەستيتسيالىق احۋالدى جاقسارتۋعا، ە ى د ۇ ستاندارتتارىن ەلىمىزگە كىرگىزۋگە باعىتتالعان جۇمىستاردىڭ جالعاسىپ جاتقانىن دا ايتتى. 2017 -جىلدان باستاپ قازاقستانعا ۆيزاسىز كەلەتىن ەلدەردىڭ قاتارى قازىرگى 35 تەن 54 مەملەكەتكە جەتەتىندىگىن ءمالىم ەتتى.
اۆتور: مارلان جيەمباي
