ۇلتتىق پانتەون سالۋعا اقشا جوق - قۋاندىق بيشىمبايەۆ
«پانتەونعا اقشا جوق. بۇل ماقساتتا ەشقانداي اقشا قاراستىرىلعان ەمەس. سىزدەرگە وسى جىلدىڭ بيۋدجەتىنە قۇرىلىس جۇرگىزۋگە قارجى قاراستىرىلماعاندىعىن ايتا الام. كەلەسى جىلعا دا كوزدەلمەگەن»، - دەدى ول بۇگىن ق ر پرەزيدەنتى جانىنداعى شەتەل ينۆەستورلارى كەڭەسى وتىرىسى اياسىندا ب ا ق وكىلدەرىنە.
ايتا كەتەيىك، تاياۋدا حالىقپەن ەسەپتىك كەزدەسۋ وتكىزگەن ق ر مادەنيەت جانە سپورت ءمينيسترى ارىستانبەك مۇحامەدي ۇلى استانادا سالىنعالى جاتقان ۇلتتىق پانتەونعا قاتىستى پىكىرىن بىلدىرگەن بولاتىن. «بىزدە ەكى جىل بۇرىن ۇلتتىق پانتەوننىڭ قۇرىلىسى جايىندا قىزۋ تالقىلاۋلار باستالدى. ءاربىر ەلدە ۇلتتىق پانتەون بار، سوندىقتان ول بىزگە دە كەرەك. نەگە ءبىز پاريج، باكۋ سياقتى قالالارعا بارعاندا پانتەون كورەمىز؟! سەبەبى تاريحتا جوعارى ورىنعا يە بولعان ۇلى تۇلعالاردىڭ ەسىمى كەلەسى ۇرپاقتار ءۇشىن دە قاستەرلى ۇلتتىق مۇرا رەتىندە قالۋى ءتيىس. پانتەوننىڭ قۇرىلىسى جونىندەگى يدەيا ۇلى جازۋشىمىز ءابىش كەكىلبايەۆ پەن اقىن فاريزا وڭعارسىنوۆا دۇنيەدەن وتكەن كەزدە تۋدى. ولاردى تۋعان جەرلەرىندە مە نەمەسە استانادا جەرلەۋ كەرەك پە دەگەن ساۋال تۋىندادى. سول كەزدە استانادا پانتەون سالۋ كەرەك دەگەن ماسەلە الدىمىزدان شىقتى. سوندىقتان استانادا وسىنداي پانتەوننىڭ بوي كوتەرۋى دۇرىس دەپ سانايمىن»، - دەگەن ەدى ول تىلشىلەرگە بەرگەن سۇحباتىندا.
اۆتور: مارلان جيەمباي
